«Եկեք կոնկրետ վայրով չասեմ։ Ինչպես հայտնի է, վերջին շրջանում իրավիճակը լարված է։ Կայուն լարված բնորոշումը կարող ենք տալ, որովհետեւ ամսի 13-ից, թեև լուրջ խնդիրներ չենք ունեցել, բայց իրավիճակը շարունակում է մնալ լարված հատկապես Արցախի հատվածում»,-լրագրողների հետ ճեպազրույցում այսօր հայտարարեց պաշտպանության փոխնախարար Արման Սարգսյանը։
Լրագրողները հետաքրքրվեցին Սյունիքի մարզի Ներքին հանդ համայնքում թշնամու առաջխաղացման մասին։ «Որեւէ տեղ առաջխաղացման հետ կապված որեւէ խնդիր չկա»,-նշեց Արման Սարգսյանը։ Հակադարձմանն ի պատասխան, որ համայնքապետը հաստատել է, Արման Սարգսյանն ասաց․ «Որեւէ բան հնարավոր չէ ՀՀ-ում թաքցնել։ Եթե նման խնդիր լինի, ՊՆ-ն կասի»։
Լրագրողները պնդեցին՝ ՊՆ-ն, առանց տեղանք նշելու, այսօր արդեն ասել է, որ առաջխաղացում չկա, մինչդեռ համայնքապետն ու բնակիչները ԶԼՄ-ների հետ զրույցներում հակառակն են հայտնել, փաստել են, որ Ներքին հանդի գերեզմանատան տարածք չեն կարողանում գնալ։ Արման Սարգսյանը, պատասխանելու փոխարեն հարցը հղած ԶԼՄ-ի լրագրողին, ասաց, որ իր նախորդ հարցազրույցում արտահայտած չեզոք բառերը վերափոխել են «ոչ չեզոք» բառերի․ «Դրա համար ձեր հարցին կպատասխանի ՊՆ լրատվական ծառայությունը։ Ես ասում եմ, որ այս պահին իրավիճակը կայուն է, սակայն չի կարելի բնորոշել, թե խնդիր չկա»։
Ապա Արման Սարգսյանը հայտարարեց․ «ՀՀ սուվերեն տարածք չեն մտել»։
Կարդացեք նաև
Լուիզա ՍՈՒՔԻԱՍՅԱՆ
