Վերաքննիչ քրեական դատարանն այսօր հրապարակեց պաշտպանության նախկին նախարար Դավիթ Տոնոյանի, ՀՀ ԶՈՒ ԳՇ պետի նախկին տեղակալ Ստեփան Գալստյանի, զենքի մատակարարմամբ զբաղվող գործարար Դավիթ Գալստյանի՝ «Պատրոն Դավո»-ի, Ռազմական ավիացիայի նախկին պետ Ավետիք Մուրադյանի նկատմամբ ընտրված խափանման միջոցի գործով որոշումը: Նախագահող դատավորը Մնացական Հարությունյանն է:
Դատարանը մերժեց պաշտպանների բողոքը Դավիթ Տոնոյանի, Ստեփան Գալստյանի եւ Ավետիք Մուրադյանի մասով: Իսկ Դավիթ Գալստյանի՝ «Պատրոն Դավո»-ի մասով բավարարեց: Վերջինիս խափանման միջոցը կփոխվի 50 միլիոն դրամի դիմաց: Դավիթ Գալստյանի պաշտպան Արմեն Հարությունյանն Aravot.am-ի հետ զրույցում ասաց, որ դատական նիստերի է եւ դժվարանում է հստակ ասել՝ մինչեւ աշխատանքային օրվա ավարտը կհասցնե՞ն գրավը վճարել եւ արդյո՞ք իր պաշտպանյալն այսօր ազատ կարձակվի: 50 միլիոն դրամ գրավի չափն առաջարկել էր պաշտպանական կողմը, սակայն, Արմեն Հարությունյանն այդքան էլ համաձայն չէ այն մտքի հետ, որ իր պաշտպանյալի խափանման միջոցը պետք է գրավի դիմաց փոխվեր: Իր գնահատմամբ, բոլոր օբյեկտիվ հիմքերը կային, որպեսզի իր պաշտպանյալը ազատության մեջ գտնվեր՝ նաեւ առանց գրավի:
Իսկ պաշտպանության նախկին նախարար Դավիթ Տոնոյանի պաշտպան Սերգեյ Հարությունյանն առայժմ չի մեկնաբանում Վերաքննիչ դատարանի կողմից իրենց բողոքի մերժումը: Դա կանի որոշումը ստանալուց հետո:
Հիշեցնենք, Դավիթ Տոնոյանը, Ստեփան Գալստյանը, Դավիթ Գալստյանը, Ավետիք Մուրադյանը մեղադրվում են «անորակ հրթիռների» գործով:
Կարդացեք նաև
Նելլի ԳՐԻԳՈՐՅԱՆ
