Առողջապահության նախարար Անահիտ Ավանեսյանը այսօր լրագրողների հետ զրույցում հարցին, թե կա՞ն դեպքեր, երբ 44-օրյա պատերազմում զոհվածների ծնողները իրենց հարազատների, որդիների մարմինների մասունքները չեն վերցնում, որովհետեւ չեն վստահում, պատասխանեց. «Այո, կան դեպքեր, երբ նույնականացվել են, արդյունքները կրկնակի անգամ, որոշ դեպքերում՝ եռակի, հաստատվել են այլ երկրներում, եւ դեռ հարազատները պատրաստ չեն վերցնելու աճյունները եւ հուղարկավորությունները իրականացնելու»:
Նա վստահեցրեց, որ մինչ այս պահը Հոլանդիա, Վրաստան, Գերմանիա եւ մի շարք այլ երկրներ կրկնակի փորձաքննության համար ուղարկված աճյունների մասունքների նմուշները բոլորը 100%-ով համապատասխանել են Հայաստանում տված արդյունքներին:
Թե քանի՞ մասունք կա՝ նախարարը հորդորեց քննչական մարմիներից ճշտել՝ ասելով, որ չի տիրապետում այդ տեղեկությանը. «Կառավարությունն անում է ամեն բան, որպեսզի ծնողները ժամանակ ունենան այդ ցավալի պրոցեսն անցնելու եւ իր վերջո հուղարկավորելու, բայց մյուս կողմից մենք հասկանում ենք, որ ինչ-որ մի ժամանակ հետո մենք պետք է անդրադառնանք այս հարցին եւ հուղարկավորենք անհատական ձեւով, եղբայրական գերեզմանի մասին խոսք չի գնում»:
Հռիփսիմե ՋԵԲԵՋՅԱՆ
