Ինչպես տեղեկացրել ենք, այսօր Անթալիայի դիվանագիտական ֆորումի շրջանակներում տեղի է ունեցել ՀՀ ԱԳ նախարար Արարատ Միրզոյանի եւ Թուրքիայի ԱԳ նախարար Մեւլութ Չավուշօղլուի հանդիպումը: Այդ հանդիպման լուսանկարը սոցցանցերում բուռն քննարկումների տեղիք է տվել: Արարատ Միրզոյանին քննադատում են, որ նա լայն ժպտում է, օգտատերերը հիշեցնում են պատերազմի զոհերի, այդ պատերազմում Թուրքիայի դերակատարման, ցեղասպանության մասին ու փորձում պատասխաններ գտնել, թե ինչու է ժպտում մեր արտգործնախարարը:
Այս առնչությամբ Aravot.am-ի հետ զրույցում քաղաքագետ Լեւոն Շիրինյանն ասաց. «Ինչի պիտի լացե՞ր Արարատ Միրզոյանը, հո Անթալիա թաղում չէ՞ր գնացել, որ չպիտի ժպտար: Վերջը պիտի մի բան սովորե՞ն այդ քննարկողները, թե՞ չէ, բոյն էլ կարճ էր երեւի: Հարսնացո՞ւ են որոշում, թե՞ ինչ են անում»: Արարատ Միրզոյանի ժպտալը քննարկողներին Շիրինյանը հորդորեց ուկրաինացիներից օրինակ վերցնել, սեփական երկրի շահերը պաշտպանել. «Անկախությունը կամրապնդվի, բոլորին աղբանոց կշպրտեն»:
Ինչ վերաբերում է այդ հանդիպմանը, Շիրինյանն ասաց. «Նորմալ է: Հայաստանը պիտի կարգավորի իր հարաբերությունները Թուրքիայի հետ եւ մյուսների հետ, եթե չէ, մնալու եք Ռուսաստանի ճորտը եւ տակը, կներեք: Ուրիշ ոչ մի տարբերակ չունեք: Հիմա դա ով է խրախուսում եւ ինչու է խրախուսում՝ երկու բան կա: Պարզ է, որ սա հյուսիսին ձեռնտու չէ եւ Հայաստանի գող-ավազակներին, անշուշտ նաեւ նախկին չեկիստներին: Հայաստանը պիտի իր քաղաքականությունը դիվերսիֆիկացնի՝ ուզում եք, թե չեք ուզում: Չէիք ուզում՝ էդ գեներալների վզից բռնեիք, տանեիք կռվել տայիք, հաղթանակ տանեիք: Ուրիշ տարբերակ չկա»:
Կարդացեք նաև
Հարցին՝ բայց արդյոք Թուրքիան նույնքան անկե՞ղծ է մեզ հետ խաղաղության հարցում, որքան մենք՝ նա պատասխանեց. «Չի կարող: Ոչ մեկը ոչ մեկից անկեղծ չի ու մյուսից խելացի չի: Դա քաղաքական գործընթաց է, պիտի հասկանալ, շահերը պաշտպանելով առաջ գնալ: Հիմա կեղծ են, անկեղծ են… Պուտինը ձեզ հետ անկե՞ղծ էր: Շոյգո՞ւն էր անկեղծ հայերի հետ: Պարզ ասել է՝ ես Ղարաբաղում ջախջախեցի հայերին, ինչո՞ւ ձեն չեք հանում, դա Շոյգուն է ասել»:
Հռիփսիմե ՋԵԲԵՋՅԱՆ
