Հայաստանի մարդու իրավունքների առաջին պաշտպան Լարիսա Ալավերդյանը «Հայելի» ակումբում վերջին օրերին Ադրբեջանի գործողությունները Արցախում եւ Հայաստանի սահմաններին հերթական անգամ որակեց ցեղասպանական գործողություններ: «Մենք առաջին անգամ չէ, որ խոսում ենք առանձին-առանձին դրվագների մասին եւ ես միշտ փորձում եմ հստակեցնել, որ այն, ինչ անում է Թուրքիան, նրա հետեւից Ադրբեջանը, բացարձակապես չեն կրում հատվածական բնույթ: Դա հետեւողական, մտածված, պլանավորված, կազմակերպված ցեղասպանական քաղաքականություն է:
Ես պետք է նորից կրկնեմ` ինչ է տեղի ունեցել 2020 թվականից եւ դրանից առաջ՝ 2018-ին: Իմ խորին համոզմամբ եւ ես կարող եմ ապացուցել, հիմնավորել, որ այդ պատերազմը տեղի է ունեցել այն պատճառով, որ Հայաստանում օրվա իշխանության եկած խումբը իրականացնում էր բոլոր կողմերով Հայաստանի թուլացում՝ թիրախավորելով բանակը, հասարակությունը, այն անձանց, որոնք հերոսական ազգային-ազատագրական պատերազմում հաղթող են դուրս եկել: Այս ամենը եւ դրա հետ միասին Հայաստանում բոլոր ինստիտուտների քայքայումը ազդանշան է եղել, ավելի շուտ՝ գործառույթներ են եղել, որոնք Ադրբեջանին տվել են հնարավորություն էլ միայն ինքն իր վրա հույս չդնելով եւ Թուրքիային անմիջապես ընդգրկել որպես ղեկավար ցեղասպանական գործողություններին: 44-օրյա պատերազմը ցեղասպանական ագրեսիա էր, հանցագործությունների հանցագործություն:
Միակ բանը, որ չի հաջողել այս իշխանությունը՝ միանգամից ամբողջ Հայաստանը հանձնել, իսկ մենք տեսնում ենք, որ Հադրութը, Շուշին այդպես անցան Ադրբեջանին: Եվ դա ոչ թե այս իշխանության շնորհքն է, այլ այստեղ խոսել են, ի գործ են դրվել Ռուսաստանի աշխարհաքաղաքական շահերը: Հիմա Ադրբեջանը ցանկանում է անել այն, ինչը չի ստացվել 44-օրյա պատերազմի ընթացքում: Եվ այստեղ դատապարտելի է անտարբերությունը, որը մենք տեսնում ենք Հայաստանի ղեկավարության եւ միջազգային հանրության կողմից»,- ասաց Հայաստանի առաջին ՄԻՊ-ը:
Իսկ թե ինչի է Ադրբեջանը հենց այս պահին կրկին ակտիվացել, Լարիսա Ալավերդյանը պարզաբանեց. «Դա թուրքական քաղաքական ձեռագիրն է: Երբ որ աշխարհում տեղի են ունենում շատ ավելի ծավալուն, մասշտաբային դեպքեր, իրենք օգտվում են այդ պահից, որ իրենց հարցերը լուծեն, քանի դեռ միջազգային ուշադրությունը զբաղված է այլ իրադարձություններով: Տվյալ դեպքում՝ կոլեկտիվ Արեւմուտքը Ռուսաստանի դեմ եւ Ուկրաինան այդ Արեւմուտքի ձեռքին որպես գործիքակազմ»:
Կարդացեք նաև
Աշոտ ՀԱԿՈԲՅԱՆ
