«Սպառողական գները վերջին երկու օրում աճ ունեցել են։ Կատարվեց մեր կանխատեսածը։ ՀՀ-ն ու Արցախը համատեղ օգտագործում են 500-600 000 տոննա հացահատիկ, որից մինչեւ պատերազմը շուրջ 30%-ն ապահովում էր Արցախը։ Քանի որ հիմա այդ հնարավորությունը չկա, մենք 99%-ով կախվածություն ունենք ՌԴ-ից»,-խորհրդարանում լրագրողների հետ ճեպազրույցում այսօր անդրադառնալով փաստին, որ ՌԴ-ն ժամանակավորապես դադարեցրել է հացահատիկի արտահանումը ԵՏՄ երկրներ՝ ասաց ԱԺ տնտեսական հարցերի հանձնաժողովի նախագահ, «Հայաստան» խմբակցության պատգամավոր Վահե Հակոբյանը։
Նա նշեց․ «Մենք ասել էինք, որ շուտով հնարավոր է՝ ՌԴ-ն կսահմանափակի արտահանումը, եւ դա տեղի ունեցավ։ Մինչեւ օգոստոս արգելված է։ Հարց կառավարությանը եւ էկոնոմիկայի նախարարությանը՝ որքանո՞վ է ապահովվել պահուստային մասը, ի՞նչ քայլեր են արվում, որ հարցի լուծում ունենանք։ Մեզ տարեկան անհրաժեշտ է 500 000 տոննա»։
Պատգամավորի խոսքով՝ կառավարության խնդիրն է նաեւ պարզել՝ կա՞ն հայաստանյան տնտեսվարողներ, որոնք պահուստավորել են հացահատիկ եւ հարմար առիթի դեպքում կարտահանեն։
Վահե Հակոբյանի բնորոշմամբ՝ որքան երկարում է ռուս-ուկրաինական հակամարտությունը եւ որքան խորանում են պատժամիջոցները ՌԴ-ի հանդեպ, այդքան էլ ազդեցություն ենք կրում մենք․ «Այո, կախում ունենք Ռուսաստանից եւ ավտոմատ կերպով խնդիր ենք ունենում։ Երկու օր է, որ այլուրի եւ ձեթի հերթերն են շատացել։ Տագնապի գործոնն էլ կա։ Քաղաքացիներին կոչ եմ անում չտագնապել եւ չափից ավելի բաներ չգնել, որովհետեւ տագնապը բերելու է ավելի վատ հետեւանքների»։
Կարդացեք նաև
Լուիզա ՍՈՒՔԻԱՍՅԱՆ
