Եվրամիության երկրների առաջնորդները հայտարարել են, որ Ուկրաինայում պատերազմ հրահրողները պետք է պատժվեն, ինչպես նաև ողջունել են Միջազգային քրեական դատարանի՝ քննություն սկսելու որոշումը:
«Ռուսաստանը և նրա հանցակից Բելառուսը կրում են ողջ պատասխանատվությունն այս ագրեսիայի համար, և մեղավորները կպատժվեն իրենց հանցագործությունների, այդ թվում քաղաքացիական բնակչության և քաղաքացիական օբյեկտների վրա ոչ ընտրողական հարվածների համար: Այդ կապակցությամբ մենք ողջունում ենք Միջազգային քրեական դատարանի դատախազի՝ քննություն սկսելու որոշումը»,- ասվում է ԵՄ ոչ ֆորմալ հայտարարության մեջ:
Այնուամենայնիվ, BBC-ն գրում է, որ ռազմական հանցագործությունների համար Պուտինին պատասխանատվության ենթարկելն այնքան էլ հեշտ չէ:
ԵՄ երկրների հայտարարության մեջ ասվում է, որ ԵՄ-ը, չսպասելով Եվրահանձնաժողովի կողմից Ուկրաինայի անդամակցության պաշտոնական հայտի քննարկմանը, շուտափույթ կերպով կամրապնդի ԵՄ-ի և Ուկրաինայի կապերը:
Կարդացեք նաև
Այդ կետն առանձնահատուկ կերպով շեշտել է ԵՄ խորհրդի նախագահ Շարլ Միշելը՝ Twitter-ում հայտարարելով ԵՄ առաջնորդների հայտարարության մասին: ԵՄ-ը նաև Ուկրաինային առաջարկում է քաղաքական, ֆինանսական, նյութական և մարդասիրական աջակցություն՝ հավաստիացնելով, որ կաջակցի պատերազմից հետո ժողովրդավարական Ուկրաինայի վերականգնմանը:
«Մենք պատրաստ ենք ավելացնել ճնշումը Ռուսաստանի և Բելառուսի վրա: Մենք արդեն լուրջ պատժամիջոցներ ենք սահմանել և պատրաստ ենք սահմանել նոր պատժամիջոցներ»,- ասվում է հայտարարության մեջ:
Պատրաստեց Վիկտորյա ԱՆԴՐԵԱՍՅԱՆԸ
