Այսօր Երեւան քաղաքի ընդհանուր իրավասության դատարանում տեղի ունեցավ իրավապաշտպան Սաշիկ Սուլթանյանի գործով հերթական դատական նիստը։ Հիշեցնենք, որ նրան մեղադրանք է առաջադրվել ՀՀ քրեական օրենսգրքի 226-րդ հոդվածի 2-րդ մասի 1-ին կետով՝ այն է՝ ազգային, ռասայական կամ կրոնական թշնամանք հարուցելը, որով Հայաստանում ապրող եզդիների իրավունքների խախտումների մասին խոսելը որակվել է որպես ազգային թշնամանքի հարուցում։ Սաշիկ Սուլթանյանի իրավունքների պաշտպանությունն իրականացնում են Հելսինկյան քաղաքացիական ասամբլեայի Վանաձորի գրասենյակի փաստաբան Սամսոն Գալստյանը եւ փաստաբան Արա Ղազարյանը: Այսօր դատարանը պետք է շարունակեր ապացույցների հետազոտումը:
Պաշտպան Արա Ղազարյանը ելույթում ասաց, որ հոդվածն իր բովանդակությամբ չի համապատասխանում Սահմանադրության՝ իրենց կողմից վկայակոչված հոդվածներին: Նա միջնորդեց դիմել ՍԴ՝ հոդվածի սահմանադրականությունը որոշելու համար:
«Հակառակ դեպքում մենք աշխատում ենք, ապացույցներ ենք հետազոտում, որն ի սկզբանե չի համապատասխանում Սահմանադրության նշված հոդվածների գործունեությանը»,-ասաց Արա Ղազարյանը՝ ներկայացնելով միջնորդության նոր տեքստը»:
Ապա թվարկեց վեց կետ՝ թե ինչու 226 հոդվածը չի համապատասխանում Սահմանադրության պահանջներին:
Լուսինե ԲՈՒԴԱՂՅԱՆ
