«Թուրք-ադրբեջանական տանդեմը փորձում է պատերազմի արդյունքներից ստանալ առավելագույնը։ Քանի դեռ ՀՀ-ն չի ամրապնդել անվտանգային համակարգերը, ամեն օր տեսնելու ենք, որ խաղաղասիրական հայտարարությունները կեղծ են։ Ինչ հնարավոր լինի՝ պոկելու են մեզանից, աշխատելու են ամեն առիթն օգտագործել, իսկ այսօր գլխավոր ուժը, որը պահում է անվտանգությունը, ՌԴ խաղաղապահ ուժերն են»,-լրագրողների հետ հանդիպմանն այսօր անդրադառնալով այն հանգամանքին, որ ռուս-ուկրաինական ռազմական բախմանը զուգահեռ՝ Ադրբեջանն այս օրերին սադրանքների է դիմում Արցախի եւ ՀՀ սահմաններին՝ ասաց ՀՅԴ բյուրոյի անդամ, ԱԺ «Հայաստան» խմբակցության պատգամավոր Արմեն Ռուստամյանը։
Նրա խոսքով․ «Վատ է, որ ՀՀ-ն այլեւս չի հանդիսանում Արցախի անվտանգության երաշխավորը, եւ սա տեսնում են նաեւ Թուրքիան եւ Ադրբեջանը։ Տեսնում են, որ ՀՀ-ն քայլ չի անում վերագտնելու այդ կարգավիճակը։ Գտնում են, որ այսօր հնարավոր է եւս մի տարածք վերցնել եւ անելանելի վիճակի մեջ դնել արցախահայությանը, որ օր առաջ լքեն իրենց տարածքները։ Ադրբեջանի նպատակն է Արցախն առանց հայերի տեսնել։ Սա ահազանգ է։ Այսօր վարչապետը դրան հպանցիկ անդրադարձավ՝ չուզեցավ ասել, որ երկար ժամանակ Արցախի գազատարը խափանված է։ Ինչո՞ւ չի ասում դրա դեմն առնելու ծրագրերը։ Հանուն խաղաղության ամեն ինչ զիջելու մոտեցումը բերելու է նրան, որ լինելիության խնդիր ենք ունենալու»։
Ռուստամյանը միաժամանակ շեշտեց՝ չի կարծում, թե ՌԴ-ն այնքան խառն է, որ չի կարող իրավիճակը վերահսկել Կովկասում, բայց սա մարտահրավեր է նաեւ ռուս խաղաղապահների համար․ «ՌԴ-ն ունի հնարավորություն կանխելու Ադրբեջանի ախորժակը ռուս-ուկրաինական լարվածությանը զուգահեռ»։
Կարդացեք նաև
ՀՅԴ բյուրոյի ներկայացուցիչ Հակոբ Տեր-Խաչատուրյանն էլ կարծիք հայտնեց, որ Ադրբեջանն այս իրավիճակում երկակի խաղ է խաղում․ «Բնականաբար, ՌԴ-ն չի ցանկանա կորցնել Ադրբեջանին, բայց վերջինս ուղղակի կապի մեջ է Ուկրաինայի իշխանության հետ։ Ելքն ինչ էլ լինի պատերազմի, ազդելու է իրավիճակի վրա»։
Լուիզա ՍՈՒՔԻԱՍՅԱՆ
