Քանի որ սոցիալական տարբեր հարթակներում, մասնավորապես թելեգրամյան 13000-ից ավելի անդամ ունեցող Relocation/ Armenia խմբում, ի թիվս այլնի, ռուս-ուկրաինական պատերազմի հետեւանքով Հայաստան տեղափոխվածները հաճախ են բարձրաձայնում հայոց լեզվի ուսուցման կուրսերի հարցը ու փաստում, որ մասնավոր պարապմունքները մի քանի հարյուր դոլարի են հասնում, Aravot.am-ը ԿԳՄՍ նախարարի տեղակալ Արթուր Մարտիրոսյանից հետաքրքրվեց` ԿԳՄՍ նախարարությունն արդյոք մտադի՞ր է հայոց լեզվի դասընթացներ նախաձեռնել ներգաղթյալների համար:
Արթուր Մարտիրոսյան
«ԿԳՄՍ նախարարությունը նման բովանդակությամբ դիմումներ չի ստացել, տեղյակ ենք, որ հակամարտությամբ պայմանավորված կա որոշակի հոսք: Բայց դեռ հարցեր կան ճշտելու, հայտնի չէ, թե այդ մարդիկ ինչքան ժամանակով են եկել Հայաստան: Այնպես որ, այս ամենը դեռեւս ուսումնասիրման փուլում է` հասկանալու խնդրի ծավալը, մասշտաբները եւ այն, թե ինչ կարելի է անել այս պարագայում»,-ասաց նախարարի տեղակալը:
Գոհար ՀԱԿՈԲՅԱՆ
