«Մուլտի գրուպ կոնցեռն» ընկերության գլխավոր տնօրեն Սեդրակ Առուստամյանի (լուսանկարում) և մյուսների գործով մարտի 10-ին կայացած դատական նիստի ընթացքում (նախագահող դատավոր Մնացական Մարտիրոսյան) մեղադրող կողմը հրապարակեց մեղադրանքը:
Հիշեցնենք՝ Սեդրակ Առուստամյանին մեղադրանք է առաջադրվել առանձնապես խոշոր չափերի հարկեր վճարելուց խուսափելու, կեղծ ձեռնարկատիրության և փողերի լվացման համար:
Ըստ մեղադրանքի՝ ՊԵԿ նախկին նախագահ Գագիկ Խաչատրյանի որդի Գուրգեն Խաչատրյանը Սեդրակ Առուստամյանին օժանդակել է առանձնապես խոշոր չափով կաշառք տալու հարցում, ապա ենթադրյալ կաշառքի գումարի հանցավոր ծագումը թաքցնելու նպատակով այն փոխանցել է Գագիկ Խաչատրյանի որդիների հետ փոխկապակցված արտերկրում գրանցված կազմակերպությունների հաշվեհամարներին։ Ըստ ԱԱԾ-ի, նկարագրված գործարքի հանցավոր բնույթը թաքցնելու և քողարկելու համար ձևականորեն կնքվել է փոխառության պայմանագիր:
Aravot.am-ի հետ զրույցում Սեդրակ Առուստամյանի պաշտպան Հովիկ Սուքիասյանը շեշտեց՝ շարունակում են պնդել, որ չեն ընդունում մեղադրանքը: Նա մանրամասնեց. «Այստեղ հանցագործության դեպքը բացակայում է, չկա կատարված հանցագործություն, հետևաբար չգիտեմ՝ ինչ նպատակ է հետապնդում այս մեղադրանքը: Գուցե չեն հասկացել, վատ քննություն են կատարել, գուցե չեն կողմնորոշվել»:
Կարդացեք նաև
Մեղադրանքի հրապարակումից հետո դատական նիստը հետաձգվեց: Հաջորդ դատական նիստը տեղի կունենա մարտի 17-ին՝ ժամը 11.00-ին:
Դատական նիստի ընթացքում կողմերը կհետազոտեն ապացույցները:
Տաթև ՀԱՐՈՒԹՅՈՒՆՅԱՆ
