«Ուժեղ Հայաստան Ռուսաստանի հետ հանուն նոր միության» շարժման կանանց ֆորումի մասնակիցներին գարնանային տոների առիթով ողջունեց «Ալյանս» առաջադիմական ցենտրիստական կուսակցության նախագահ Տիգրան Ուրիխանյանը:
Aravot.am-ի հետ զրույցում նա խոսեց այսօր Հայաստանում տիրող ընդհանուր մթնոլորտի մասին: «Միառժամանակ առաջ մեր երկրում տրամաբանությունից, բարքերից ու պատկերացումներից դուրս էր հայրենակցի հանդեպ ատելության դրսեւորումը՝ խոսքով, արարքով, անձնական, կենցաղային, քաղաքական տիրույթներում: Բայց արի ու տես, որ հիմա դա դարձել է սովորական գիծ: Երբ ծայրահեղ բացասական, քանդող եւ ապակառուցողական երեւույթները դառնում են ընդունելի, դա ինքնաոչնչացման մեխանիզմի մեկնարկն է:
Ի՞նչը բերեց դրան: Իմ անձնական, գուցեեւ՝ սխալ, բայց համոզված կարծիքով՝ իշխանությունը, որը իրականում կոչված պետք է լիներ կազմակերպել մեր երկրի հասարակության կյանքը, կենսակերպը, կացութաձեւը, միասնականությունը: Ցանկացած ոք կարող է ասածս վերլուծել եւ ժամանակագրական համեմատությամբ հետեւել, թե երբ սկսվեցին այդ երեւույթները եւ ովքեր են եղել իշխանություն»,- ասաց մեր զրուցակիցը:
Աշոտ ՀԱԿՈԲՅԱՆ
