«Varieties of democracy institute»-ն այսօր հրապարակել է 2022թ․-ի ժողովրդավարության զեկույցը՝ «Ավտորիտարիզմը փոխում է իր բնութագիրը» խորագրով․ 2021թ․-ի իրադարձություններն ամփոփող այս զեկույցի համաձայն՝ ՀՀ վարչակարգը մինչեւ 2020թ․-ը սահմանված ընտրական ավտորիտարիզմից անցում է կատարել ընտրական ժողովրդավարությանը, այսինքն՝ ՀՀ-ն այլեւս չի դասակարգվում ազատականացված, ավտորիտար ռեժիմների շարքում, այլ վերելք է գրանցել եւ ստացել նոր դասակարգում։ Այս մասին այսօր ԱԺ արտահերթ նիստում հայտարարեց ՔՊ-ական պատգամավոր Արուսյակ Ջուլհակյանը։
Նա նշեց․ «Ըստ զեկույցի՝ Հայաստանը եւ Բոլիվիան 2021թ․-ին ընտրական ավտորիտարիզմից ժողովրդավարական անցում են կատարել դեպի ընտրական ժողովրդավարություն։ Զեկույցը ՀՀ-ին եւ Վրաստանին արեւելյան Եվրոպայում առանձնացնում է որպես ժողովրդավարացող երկրներ եւ ընդգծում, որ համաշխարհային մասշտաբով ՀՀ-ն, Մալայզիան եւ Սեյշելները վերջին տասը տարում գրանցել են ընտրական մարմինների ինքնավարության էական առաջընթաց»։
Ջուլհակյանը շեշտեց․ «Չնայած այս ամբիոնից հնչող մի շարք պնդումների, այս զեկույցի բովանդակությունը միակը չէ ՀՀ-ում գրանցված ժողովրդավարական առաջընթացի մասին։ Սա վկայում է, որ ՀՀ-ում ժողովրդավարությունն այլեւս անշրջելի է»։
Կարդացեք նաև
«Հայաստան» դաշինքից Արամ Վարդեւանյանն այսպես արձագանքեց․ «Հուսամ՝ հաջորդ անգամ «Freedom house»-ին կամ «Amnesty international»-ի զեկույցներին հղում կտաք, որոնցում այդքան էլ լավ բառեր գրված չեն։ Ցավոք։ Մյուս կողմից, իրականությունն է գրված։ Մալայզիայի եւ Սեյշելների հետ համեմատությունը կարող է դրական լինել, բայց չեմ կարծում, որ մենք այդ երկրների հետ մի խմբում ենք կամ երբեւէ եղել ենք»։
Լուիզա ՍՈՒՔԻԱՍՅԱՆ
