Արագածոտնի մարզի Ապարան համայնքի թիվ 2 հիմնական դպրոցի տնօրեն Նաիրա Ղազարյանն այդ պաշտոնում էր մինչեւ մարտի 1-ը։ Նրա պաշտոնավարման ժամկետը լրացել է: «Որոշ պաշտոնյաներ իրենց աշխատավայրերում որոշում են, թե ինչպես շրջանցել տնօրենի ընտրության գործընթացը կարգավորող իրավական ակտերի պահանջները: 2021թ դեկտեմբերի 5-ին Ապարանում տեղի ունեցան համայնքապետի ընտրություններ: Ընտրություններից մի քանի օր առաջ ինձ հրավիրեցին մարզպետարան, որպեսզի ՔՊ-ական ցուցակով հանդես գամ որպես ավագանու անդամ, իսկ ես հրաժարվեցի: Մտահոգ մարդիկ տեղեկացրին, որ իմ անունն արդեն վերցրել են շրջանակի մեջ` ապագայում պատժելու համար»,- «Հայելի» ակումբում ասաց Նաիրա Ղազարյանը:
«Ես երբեւէ որեւէ կուսակցության անդամ չեմ հանդիսացել ի տարբերություն որոշ քաղաքական առնետների, որոնք զբաղվում են առնետավազքով իրենց համար տաքուկ տեղը գտնելու համար: ՄԵծ ցավ ու հիասթափություն եմ ապրում, որ Արագածոտնի մարզի պատգամավոր Մաթեւոս Ասատրյանը եւ ներկայիս փոխմարզպետ, նախկին ՀՀԿ-ական Էդգար Փարվանյանը՝ օգտագործելով իրենց պաշտոնական դիրքը՝ իրենց վարքով, գործողություններով, պահվածքով, որոշումներով էլ ավելի հիասթափեցնում են մեզ: Այդ ամենը բերում է նրան, որ վերջնականապես մեր հավատը կորցնենք գործող իշխանությունների նկատմամբ»,-հավելեց Նաիրա Ղազարյանը:
Նրա խոսքով, դպրոցը պետք է ապաքաղաքական կառույց լինի, մինչդեռ ներկայումս այլ իրավիճակ է տիրում. «Դպրոցի տնօրենը չպետք է դառնա քաղաքական կապանքների զոհ․․․ 2022թ փետրվարի 14-ին Ապարանի թիվ 2 դպրոցում պետք է տեղի ունենար տնօրենի ընտրություն: Ըստ կարգի՝ նիստը համարվում է իրավազոր, եթե նիստին մասնակցում է կառավարման խորհրդի անդամների ընդհանուր թվի 2/3-ը: Առնվազն 6 հոգի պետք է ներկա լիներ նիստին: Ինչպես եւ կանխատեսվում էր, մարզպետարանի 4 աշխատակիցները չներկայացան մրցույթին, որոնցից 3-ը առաջադրվել էին մարզպետի կողմից, մյուսը` ԿԳՄՍ նախարարության կողմից: Մրցույթը հետաձգվեց քվորում չապահովելու պատճառով 5 աշխատանքային օրով:
Հաջորդ մրցույթը տեղի ունեցավ փետրվարի 21-ին: Ծնողական եւ ուսուցչական խորհուրդների կողմից վստահության քվեն ինձ էր տրվել: Մտածում էինք, որ գուցե այս անգամ մարդիկ կներկայանան մրցույթին, սակայն մարզպետարանի 4 աշխատակիցները կրկին չմասնակցեցին մրցույթին՝ ձախողելով այն: Մրցույթը չկայացավ, եւ ըստ կարգի՝ նոր մրցույթ հայտարարվեց»:
Կարդացեք նաև
Նախկին տնօրենն ընդգծեց, որ իր պաշտոնավարման ժամկետը լրանալուց հետո, ինքն ազատվել է աշխատանքից եւ իր փոխարեն իշխանություններն իրենց «մարդուն» են նշանակել ժամանակավոր պաշտոնակատար. «Տնօրենի ժամանակավոր պաշտոնակատար է նշանակվել Էդգար Փարվանյանի եղբոր կինը, ոչ թե փոխտնօրեններից մեկը»:
Գոհար ՀԱԿՈԲՅԱՆ
