«Փաստացի տեղի է ունենում առնվազն տնտեսական պատերազմ ՌԴ-ի և արևմուտքի միջև: Արևմտյան պետական գործիչները, նույնիսկ երկրի ղեկավարների մակարդակով հայտարարում են, որ իրենց նպատակը Ռուսաստանի տնտեսության ոչնչացումն է»,-«Մեդիա կենտրոնում» «Ռուս-ուկրաինական պատերազմ. հաղթանակի ու պարտության գինը» թեմայով հրավիրված առցանց քննարկման ժամանակ կարծիք հայտնեց քաղաքագետ Բենիամին Պողոսյանը:
Նա դժվարացավ ասել՝ ինչպիսին կլինի ՌԴ-արևմուտք տնտեսական պատերազմի ավարտը, բայց կարծում է, որ տնտեսագետներն էլ չեն կարող հստակ բան ասել:
Հարցին՝ ՌԴ-ի համար ներքաղաքական առումով ի՞նչ հետևանքներ կարող է ունենալ ռուս-ուկրաինական պատերազմը, Բենիամին Պողոսյանը պատասխանեց. «Չեմ կարծում, որ այնտեղ կտրուկ փոփոխություններ լինեն: Արևմուտքը երկու սցենարի վրա է շեշտը դնում. պալատական հեղաշրջում, երբ ՌԴ-ի ֆինանսական էլիտան, գումարած որոշակի ռազմական էլիտա` կփորձեն պալատական հեղաշրջում իրականացնել և Պուտինին կհեռացնեն նախագահի պաշտոնից: Սա արևմտյան սցենարներից մեկն է: Հուսով եմ, որ այս պատժամիջոցները, որոնք անմիջապես հարվածում են ազդեցիկ մարդկանց ՌԴ վերնախավում, կհանգեցնեն նրան, որ այդ վերնախավը կփորձի պալատական հեղաշրջում իրականացնել:
Եվ երկրորդը. մի փոքր երկարաժամկետ արևմտյան սցենարն է, որ տնտեսական պատժամիջոցներն էականորեն կնվազեցնեն միջին ռուսաստանցու կենսամակարդակը, որն առանց այդ էլ չէր փայլում իր բարձրությամբ: Եթե Պուտինը իշխանությունից չհեռանա պալատական հեղաշրջմամբ, մյուս սցենարն այն է, որ նա հեռանա զանգվածային բողոքի ցույցերով, ինչպես արևմուտքում են ասում, սովածների ցույցերով:
Կարդացեք նաև
Իհարկե, ոչինչ չի կարելի բացառել, բայց իմ գնահատմամբ՝ գոնե առայժմ այս երկու սցենարների հավանականությունը բավականին փոքր է: Բավականին փոքր է հավանականությունը, որ գոնե ամիսների ընթացքում կամ մինչև 2022-ի ավարտը Վլադիմիր Պուտինին կհեռացնեն կամ պալատական հեղաշրջմամբ կամ տասնյակ հազարավոր, հարյուր հազարավոր սովյալների բունտի արդյունքում»:
Տաթև ՀԱՐՈՒԹՅՈՒՆՅԱՆ
