«Բավականին ուշացած բացահայտում է։ ԱԱԾ-ն մի փոքր այլ տեղ պետք է ման գա, բարձրաստիճան քաղաքական դեմքերով եւս պետք է զբաղվի, որոնք իրենց քաղաքականությամբ բերեցին այս վիճակին։ Ամեն երկիր փորձելու է հակառակորդ երկրում գործակալական ցանց հիմնել, եւ Ադրբեջանի մոտ ավելի լավ է դա հաջողվում, որովհետեւ մեր ԱԱԾ-ն սատանաների որսով էր զբաղվում, ոչ թե երկրի ազգային անվտանգությամբ»,-«Հենարան» մամուլի ակումբում լրագրողների հետ հանդիպմանն այսօր անդրադառնալով ԱԱԾ-ի՝ ՀՀ-ում եւ Արցախում բացահայտած հերթական գործակալական ցանցին՝ ասաց մեդիափորձագետ Տիգրան Քոչարյանը։
«Այդ ցանցը պետք է բացահայտված լիներ դեռ պատերազմի ժամանակ, որովհետեւ ԱԱԾ-ն բանակում ունի իր ստորաբաժանումները։ Փաստորեն, եթե մեկ ու կես տարի անց է նման բան բացահայտվում, առաջինն ԱԱԾ-ին պետք է մեղադրել։ Լավ չեն աշխատել, թերացել են համապատասխան կառույցներում։ Տեղում էր պետք բացահայտել։ Եթե մի հարյուր հոգի բացահայտվում է, բայց տեղեկությունը չափաբաժիններով են մատուցում, որ ժողովրդին զբաղեցնեն կամ սեփական վարկանիշը վերականգնեն»,-գնահատական հնչեցրեց Տիգրան Քոչարյանը։
Նրա խոսքով՝ դեռ պետք է հասկանալ՝ այդ բացահայտված մարդիկ բոլո՞րն են նման գործողություններով զբաղվել․ «Դատարանի որոշում թող լինի, որ մարդուն ինչ-որ բանում մեղադրենք։ 2018թ․-ին իշխանության գալով՝ այս իշխանությունը որոշեց, որ Ադրբեջանը թիվ մեկ թիրախը չի այլեւս քարոզչության համար։ Հանրային կապերի ՊՈԱԿ-ին, որը դիմակայում էր հակահայկական քարոզչությանը, ասվեց, որ այլեւս չեն «բզելու» Ադրբեջանին։ Այդպես երկրիդ դարպասները բացում ես թշնամու գործակալների առաջ, եւ Ադրբեջանն օգտվել է դրանից։ Ցավոք։ Թիվ մեկ մեղավորն ուժային կառույցներն են՝ ոչ միայն ԱԱԾ-ն, այլեւ ռազմական հակահետախուզությունը»։
Կարդացեք նաև
Լուիզա ՍՈՒՔԻԱՍՅԱՆ
