Պաշտոնական Բաքուն դիմել է Ռուսաստանի պաշտպանության նախարարությանը՝ կոչ անելով դադարել «Լեռնային Ղարաբաղ» եզրն օգտագործելուց, քանի որ «Ադրբեջանի տարածքում նման վարչատարածքային միավոր չկա»:
«Ռուսաստանի պաշտպանության նախարարության կողմից օգտագործվող «Լեռնային Ղարաբաղ» եզրը Ուկրաինա ուղարկված մարդասիրական օգնության մասին հայտարարության մեջ անթույլատրելի է», -ասվում է Ադրբեջանի ՊՆ կայքում հրապարակված հայտարարության մեջ:
Գերատեսչությունում նշել են, որ ռուսական կողմն իր հայտարարություններում բարձր և բարձրագույն մակարդակներում բազմիցս հաստատել է աջակցությունն Ադրբեջանի տարածքային ամբողջականությանը, ինքնիշխանությանը և սահմանների անխախտելիությանը, այդ դիրքորոշումն արձանագրված է նաև երկու երկրների ստորագրած բազմաթիվ փաստաթղթերում:
Կարդացեք նաև
Այնուամենայնիվ, ըստ պաշտոնական Բաքվի, ի հեճուկս ՌԴ պաշտոնական դիրքորոշման, նախկինում էլ նման դեպքեր են եղել, երբ Ռուսաստանի ռազմական գերատեսչությունն այդ անվանումն է կիրառել «Ադրբեջանի ինքինշխան տարածքների մասին խոսելիս»:
«Նման հայտարարությունները կարող են վնասել ռուս-ադրբեջանական հարաբերություններին և պատճառ դառնալ իրավիճակի սրացման ադրբեջանական տարածքներում, որտեղ ժամանակավորապես տեղակայված են ռուս խաղաղապահները»,- ասվում է հայտարարության մեջ:
Պատրաստեց Վիկտորյա ԱՆԴՐԵԱՍՅԱՆԸ
