Ծաղիկները գարնան խորհրդանիշն են, ավետաբեր մանուշակից ու ձնծաղիկից հետո հաջորդ ծաղիկը, որն աչքի է ընկնում նրբությամբ, խորհրդանշում սեր եւ երջանկություն, կակաչն է: Իսկ կարմիր կակաչները խորհրդանշում են կրքոտ սեր: Երկրներ կան, որ անգամ կակաչներին ու վարդակակաչներին նվիրված տոներ ու փառատոներ ունեն: Դրանցից մեկը Նիդերլանդներն է, որն ամեն տարի հունվարին նշում է Կակաչի տոնը՝ ուրախություն ու գեղեցիկ ծաղիկներ նվիրելով տոնի մասնակիցներին:
Մարտի 7-ին Երեւանում առաջին անգամ նման տոն ստեղծելու փորձ արեց նաեւ PROFAL GROUP ընկերությունն իր О2 Gardens նախագծի շրջանակում: Հյուսիսային պողոտայի սկզբնամասում բացվեց Tulip Market, որտեղ ներկայացված էին շուրջ 60 տեսակի ավելի քան 14000 կակաչներ: Ծաղկային տոնավաճառի այցելուները հնարավորություն ունեին ոչ միայն իրենց ձեռքով հողից քաղել ծաղիկները՝ սոխուկներով, այլեւ դրանք ձեռք բերել յուրահատուկ փաթեթավորմամբ: Ծաղկի բացօթյա տոնավաճառը հետաքրքրել էր նաեւ այս օրերին Երեւանում գտնվող օտարերկրացիներին, նրանք լուսանկարվում էին կակաչների ֆոնին, ոմանք ծաղիկներ գնում իրենց սիրելիների համար:
Կարդացեք նաև
Նախագծի համակարգող Արմինե Հարությունյանը նշեց, որ ոգեշնչվել են Հոլանդիայում անցկացվող Կակաչի միջազգային օրվանից: Նրա խոսքով, Հոլանդիան ծաղկի մշակույթի երկիր է, որտեղ մարդիկ առանց որեւէ հատուկ առիթի ծաղիկներ են գնում իրենց համար եւ սիրում դրանք նվիրել միմյանց: Նա հույս հայտնեց, որ նախագիծը շարունակական կլինի, ու չի բացառվում, որ հաջորդ անգամ այլ ծաղիկների հրավառություն լինի:
Գոհար ՀԱԿՈԲՅԱՆ
