Թատրոնի միջազգային օրը Վանաձորի Հովհաննես Աբելյանի անվան պետական դրամատիկական թատրոնում տեղի կունենա Սամվել Խալաթյանի «Արտավազք» պիեսի բեմադրության առաջնախաղը: Բեմադրության ռեժիսորը Արեն Օսիպյանն է. «Ներկայացումը բավականին սպասված էր մեր ժամանակների համար: Ինչպես գիտենք, թատրոնն այնպիսի միջավայր է, որը հանդիսատեսին թույլ է տալիս հայտնվելու այլ աշխարհի իրականության մեջ, տարածաշրջանային այլ հարթության մեջ, եւ այդ տիրույթը պետք է կարողանա հանդիսատեսի վրա թողնել՝ կրթության ու մշակութային ժամանցի իր բարերար ազդեցությունը: Ես կարծում եմ, որ այս պիեսը շատ կարեւոր դասեր ունի բոլորիս համար: Նախ վեր է հանում հանրության բոլոր տիպի արատները եւ ըստ էության, եթե անգամ չի տալիս այդ արատների շտկման բանալիները, գոնե թողնում է մտածելու տեղ, թե մենքը ի՞նչը չենք արել, որ այսօր ունենք հանրության այսպիսի շերտեր»,- մեզ հետ զրույցում ասաց դրամատիկական թատրոնի տնօրեն Լուսինե Սահակյանը:
Պիեսի հենքում հայոց արքա Արտավազդ առաջինն է, որն ինչ-որ հրաշքով հայտնվում է մեր օրերում, օթեւանում 5 աստղանի «Արտավազդ» հյուրանոցում: Վերջինս բախվում է այն իրականությանը, որ երկիրն իր հասարակական-ազգային-պետական սկզբունքներից արտավազքի մեջ է հայտնվում. «Այստեղ Արտավազդ արքայի եւ իրականության բախումն է: Իրականությունը չի հարմարվելու արքայի հետ, որովհետեւ ինքն է եկել այլ ժամանակներ եւ ստիպված ինքը պետք է փորձի հարմարվել: Բայց քանի որ իր եւ իրականության մեծ այդ վիհը շատ մեծ է, ինքը պետք է ստիպված նաեւ հեռանալու որոշում կայացնի»:
Լուսինե Սահակյանի խոսքով՝ մտավախություն չեն ունեցել, որ գուցե պատմական վեպը ավելի ժամանակակից ներկայացնելու դեպքում, հանդիսատեսի կողմից դրական արձագանք չստանա. «Ըստ էության պատմականությունը մնում է միայն արքայի կերպարի մեջ: Յուրաքանչյուր գեղարվեստական գործ, երբ որ դրամատուրգն ու ռեժիսորը փորձում են համադրելի արդյունք ստանան, ես չեմ կարծում, որ չընդունվի: Կարծում եմ սա դառնալու է թատրոնի սիրված ներկայացումներից, որովհետեւ ասելիքով ինքը խիստ արդիական ներկայացում է»:
Թատրոնի տնօրենը տեղեկացրեց նաեւ, որ թատրոնի միջազգային օրվա կապակցությամբ իրենք «Երկիր հայրենի» ներկայացումով կմասնակցեն նաեւ «Արտավազդ» մրցանակաբաշխությանը:
Կարդացեք նաև
Տաթեւիկ ՂԱԶԱՐՅԱՆ
