«Ունե՞նք հացահատիկի խնդիր, որովհետեւ հիմնականում ՌԴ-ից ենք ներկրում, հացի թանկացման ռիսկ կա՞»։ Այս հարցին ի պատասխան՝ այսօր խորհրդարանում լրագրողների հետ ճեպազրույցում ՔՊ-ական պատգամավոր, ԱԺ արտաքին հարաբերությունների հանձնաժողովի նախագահ Էդուարդ Աղաջանյանն ասաց․ «Հարցի ակնկալիքը ո՞րն է, որ ՀՀ հացահատիկի պաշարի մասին տեղեկություն տա՞նք։ Դա գաղտնի տեղեկություն է, ի դեպ, չի հրապարակվում։ Ռիսկերի մասին է խոսքը»։
Լրագրողը հստակեցրեց՝ ի՞նչ է արվում, որ ՀՀ-ն հացահատիկի խնդիր չունենա։ Էդուարդ Աղաջանյանը պատասխան հարց հնչեցրեց․ «Ուզում եմ հասկանալ՝ ինչո՞ւ եք հացահատիկի թեմայի վրա ֆիքսվել»։
Նկատառմանն ի պատասխան, որ ՀՀ-ն մեծամասամբ ներկրող երկիր է եւ ներկրում է հենց ՌԴ-ից, Աղաջանյանը շարունակեց․ «Իմ հարցը հռետորական է։ Եթե խոսքը գործող կոնֆլիկտից բխող ռիսկերի մասին է, այդ թվում՝ ՀՀ-ին վերաբերող, ապա հացահատիկը նման բազմապիսի ռիսկերից մեկն է։ Ըստ այդմ, չեմ հասկանում, թե ինչու է լրագրողական համայնքը կամ դրա մի մասն այդպես սեւեռվել հենց հացահատիկի խնդրի վրա, որովհետեւ գուցե այլ՝ ավելի կարեւոր եւ ռիսկային խնդիրներ կան»։
Կարդացեք նաև
Լուիզա ՍՈՒՔԻԱՍՅԱՆ
