Սյունիքի մարզի դատախազ Էդուարդ Հարությունյանին սյունեցի չլինելը օգնո՞ւմ, թե խանգարում է աշխատել՝ Aravot.am-ի այս հարցին ի պատասխան Էդուարդ Հարությունյանն ասել է, որ աշխատանքային գործունեության ընթացքում պաշտոններ է զբաղեցրել Հայաստանի տարբեր մարզերում։
«Երբեւէ տարբերակված մոտեցում չեմ զգացել, ինքս էլ այդպիսին չեմ ցուցաբերել: Իսկ ընդհանուր առմամբ ռոտացիան միշտ դրական է ազդում աշխատանքի արդյունավետության վրա: Սյունիքի մարզում գտնվելն ու աշխատելն ինձ համար առաքելություն է՝ նպաստելու հատկապես այս դժվար պահին մարզի բնակիչների բարօրությանը, մարզի տարածքում օրինականության ապահովմանը: Այդ առումով ես եւ մարզի դատախազության յուրաքանչյուր դատախազ, աշխատակից գործադրում ենք առավելագույն ջանքեր՝ միաժամանակ կիսելով բոլոր այն բարդությունները, որոնց բախվում է մարզի բնակչությունը»,-ասել է Սյունիքի դատախազը:
Սյունիքի մարզի դատախազությունում թափուր տեղեր չկան: Անցած տարի չի եղել դեպք, որ աշխատակիցներից որեւէ մեկը համակարգից հեռացվի, բայց եղել են աշխատակիցներ, որոնք տեղափոխվել են այլ տարածքի դատախազություններ։ Քիչ չեն եղել համալրումները։ «Դատախազների թեկնածուների ցուցակների համալրման գործընթացում կատարված օրենսդրական փոփոխությունները նպաստել են համակարգում կադրային խնդիրների լուծմանը: Սակայն դատախազները շարունակում են աշխատել գերծանրաբեռնված: Տարեկան կտրվածքով Սյունիքի մարզի դատախազության դատախազների հսկողական վարույթում միջին հաշվով չնայած գտնվում է շուրջ 130 քրեական գործ, այդուհանդերձ նրանք պատվով կատարում են իրենց առջեւ դրված խնդիրները»,-նշում է Էդուարդ Հարությունյանը:
2022 թվականին Սյունիքի մարզի դատախազությունն իր առջեւ խնդիրներ է դրել հատկապես պետական շահերի պաշտպանության ոլորտում համապատասխան ուղղություններով էականորեն ավելացնել ուսումնասիրությունների քանակը, ինչպես նաեւ ավելի ակտիվացնել հանցագործություններով ֆիզիկական եւ իրավաբանական անձանց, ինչպես նաեւ պետությանը պատճառված վնասների վերականգնման գործընթացում կիրառվող միջոցառումները: Նշենք, որ Սյունիքում անցած տարի հանցագործությունների թվի աճ է գրանցվել։
Կարդացեք նաև
«Ունեցած ողջ գործիքակազմով ուժեղացնելու ենք կրկնահանցագործությունների դեմ պայքարը»,-համոզված է մարզի դատախազը: Ըստ Էդուարդ Հարությունյանի՝ աշխատանքներ են տարվելու բնակչության հետ կապը ավելի սերտ դարձնելու համար, ինչի համար նախատեսում են ավելացնել քաղաքացիների ընդունելությունների թիվը։
Հիշեցնենք, Սյունիքի մարզի դատախազ Էդուարդ Հարությունյանը պատասխանել է Aravot.am-ի հարցերին։ Հարցազրույցի ծավալի հաշվի առնելով այն ներկայացնում ենք հատվածաբար։
Արմեն ԴԱՎԹՅԱՆ
