Այսօր սպարապետ, Արցախի ու Ազգային հերոս Վազգեն Սարգսյանը կդառնար 63 տարեկան: Եռաբլուրի զինվորական պանթեոնում կազմակերպված միջոցառման ժամանակ Երկրապահ կամավորական միության անդամները նրա մասին հիշողություններ են պատմում, մեջբերում խոսքերը. «Զորամասերից մեկում Վազգեն Սարգսյանը անկաշկանդ զրույց է սկսում շարահրապարակում հավաքված զինվորների հետ: Այդ օրերին հայոց բանակի զինվորների գոտու ճարմանդին գրված էր՝ Հ.Բ.՝ Հայկական բանակ: Նախարար Վազգեն Սագսյանը հարցնում է զինվորին՝ գիտե՞ս, թե ինչ են նշանակում այդ տառերը: Զինվորը խրոխտ առաջ է գալիս, բացում հապավումը՝ «Պարո՛ն նախարար, Հ.Բ. նշանակում է՝ հասնենք Բաքու»: Վազգեն Սարգսյանը գրկում է զինվորին եւ շրջապատով մեկ լսվում է նրա բարձր ծիծաղը»:
Սպարապետը հուշերից մեկում գրում է. «Ամեն զինվորի հետ ինձնից մի քիչ ճանապարհում եմ»: Վազգեն Սարգսյանը նաեւ ասում էր. «Մեզանի՛ց եմ վախենում, որ միլիոնավոր միտինգներից, Սումգայիթից ու երկրաշարժից հետո էլի մեկմեկու անվերապահորեն սիրել, ներել, հանդուրժել չսովորեցինք: Բռունցքված ձեռքն այսօր բուռ է դառնում եւ գրանցում ու աշխատատեղ է վաճառում գաղթականին, տնակ՝ աղետյալին: Վախենում եմ մեր՝ խելքի չգալուց: Ամենից շատ վախենում եմ նրանցից, ովքեր ոչ մի բանից չեն վախենում»:
ԱԺ նախագահի պարտականությունները կատարող Հակոբ Արշակյանը նույնպես ելույթ ունեցավ: Նա ասաց, որ Վազգեն Սարգսյանի խիզախությունների, հերոսությունների մասին շատ երկար կարելի է խոսել. «Բայց ամենակարեւոր եւ հիմնական գիծը, որ նկատել եմ թե՛ նրա գործերում, թե՛ նրա աշխատանքներում, իհարկե կայանում է նրա մեծ առաջնորդության մեջ: Առաջնորդություն, որ իր մեջ պարփակում էր իր անսահման սերը իր հայրենիքի յուրաքանչյուր կտորի, ծառ ու քարի, ամենակարեւորը՝ մարդկանց մասին: Նա սիրում ու հոգ էր տանում յուրաքանչյուր զինվորի, զինվորի հարազատի, մերձավորի մասին: Առանց այդ սիրո անհնար է ունենալ բարձր առաջնորդություն ու օրինակ ծառայել իր զինվորի համար: Առաջնորդը առաջին հերթին կանգնում է իր զինվորների ոչ թե թիկունքում, այլ առաջին շարքերում: Նա իր փորձով, ռազմական ու քաղաքական ուղով ցուցադրել է իսկական առաջնորդի այն ամբողջ պատկերը, որ կարող ենք կարդալ համաշխարհային գրականությունում»:
Հակոբ Արշակյանը շնորհավորեց Վազգեն Սարգսյանի ընտանիքի անդամներին, հարազատներին:
Կարդացեք նաև
Հռիփսիմե ՋԵԲԵՋՅԱՆ
