Երեւան քաղաքի ընդհանուր իրավասության դատարանում այսօր շարունակվում էր Արցախի ԱԺ նախկին պատգամավոր Վահան Բադասյանի գործով նիստը: Դատավորը Կարեն Ֆարխոյանն է։
Մեղադրող դատախազն այսօր հնչեցրեց մեղադրանքը: Ըստ այդմ, Վահան Բադասյանը մեղադրվում է ՔՕ-ի 301 հոդվածով՝ սահմանադրական կարգի տապալման մեջ: Մեղադրանքը ենթադրում է 500.000 դրամ տուգանք։ Սակայն իր ճառում մեղադրողը նշեց, որ Վահան Բադասյանը 13 օր անցկացրել է անազատության մեջ եւ դատարանից պահանջեց տուգանքի չափը սահմանել 450.000 դրամ։
Նրա խոսքերով՝ թեեւ Վահան Բադասյանը նախաքննության ընթացքում ընդունել էր իր մեղքը, իսկ դատաքննության ընթացքում՝ ոչ, սակայն հետազոտված ապացույցներով հաստատվում է նրա մեղադրանքը։
Դատախազը պատիժը մեղմացնող հանգամանք դիտարկեց Արցախյան 44-օրյա պատերազմին մասնակցելը եւ լուրջ վիրավորում ստանալը։
Կարդացեք նաև
Հիշեցնենք՝ ԱԱԾ-ն Վահան Բադասյանին ձերբակալել էր 2021 թվականի հունվարի 28-ին Եռաբլուրում հնչեցրած հայտարարությունների համար։ Վահան Բադասյանը լրագրողների հետ զրույցում ասել էր, թե Նիկոլ Փաշինյանին պետք է հեռացնել․ «Այսինքն՝ դա ենթադրում է, որ թշնամուն մենք պետք է վերացնենք… այո, նաեւ զենքի միջոցով… այո, ես սպառնալիքի կոչեր եմ անում եւ գիտակցաբար եմ անում, թող ԱԱԾ-ն ինձ ձերբակալի»։ Վահան Բադասյանին մեղադրանք է առաջադրվել 301 հոդվածով՝ սահմանադրական կարգը տապալելու եւ իշխանությունը յուրացնելու կոչեր հնչեցնելու համար։
Նիստը կշարունակվի մարտի 7-ին, ժամը 13.30-ին:
Նելլի ԳՐԻԳՈՐՅԱՆ
