ԵԱՀԿ ԽՎ-ում ԱԺ պատվիրակության անդամներն այսօր ասուլիս էին հրավիրել: Պատվիրակության ղեկավար Էդուարդ Աղաջանյանը անդրադարձավ ռուս-ուկրաինական պատերազմին:
Հարցին Հայաստանը ի՞նչ դիրքորոշում ունի, երկար ժամանակ հնարավոր չի որեւէ դիրքորոշում չհայտնել այդ թեմայով ու խուսափել դրանից՝ նա պատասխանեց, որ Հայաստանը իր դիրքորոշումը հայտնել է. «Հայաստանը խորապես մտահոգված է իրավիճակով: Ցավոք, ինչպես եւ մենք ու մեր ժողովուրդը, պատերազմի արհավիրքի հետեւանքները մեր մաշկի վրա զգալով՝ բնականաբար, կարողանում ենք ապրումակցել ու գնահատել իրավիճակը: Որեւէ պատերազմ բնականաբար ունենում է շատ ցավալի հետեւանքներ ու ՀՀ-ն հանդես է գալիս խաղաղության եւ բանակցային ճանապարհով հարցերի լուծման կողմնակից: Իրավիճակը, իհարկե, մտահոգիչ է ու ՀՀ-ն, լինելով միջազգային հանրության անդամ ու ունենալով որոշակի դիրքորոշում, որ արդեն նշեցի, բացի դրանից՝ մտահոգված է մեր տարածաշրջանում այս գործընթացի հետեւանքներով: Մենք հետեւում ենք զարգացումներին ու ՀՀ-ն պետք է պատրաստ լինի բոլոր այն հետեւանքներին, որոնք կարող են ի հայտ գալ որեւէ զարգացման արդյունքում: Այսինքն, ինչպես արդեն նշեցի, ամենացանկալի զարգացումը իրերի կլինի օր առաջ ռազմական գործողությունների դադարեցումն ու անցնելը դիվանագիտական ճանապարհով հարցի լուծմանը: Բայց սրանք հարցեր են, որոնք ՀՀ-ի վերահսկողությունից բնականաբար դուրս են ու միակ բանը, որ մնում է, մեր տարածաշրջանում գնահատել ռիսկերն ու շարժվել առաջ»:
Հռիփսիմե ՋԵԲԵՋՅԱՆ
