Լիլիթ Գալստյանը ելույթ է ունեցել ԵԱՀԿ ԽՎ հանձնաժողովի նիստի ընթացքում
Եվրոպայի անվտանգության եւ համագործակցության կազմակերպության խորհրդարանական վեհաժողովի՝ փետրվարի 24-25-ը տեղի ունեցած ձմեռային նստաշրջանի աշխատանքներին մասնակցել է կառույցում ՀՀ ԱԺ պատվիրակության անդամ Լիլիթ Գալստյանը: Ելույթ ունենալով Ժողովրդավարության, մարդու իրավունքների եւ հումանիտար հարցերի հանձնաժողովի նիստում՝ պատգամավորը նշել է.
«Հարգելի գործընկերներ,
ավաղ, Ադրբեջանի պատվիրակությունը երբեք չի խուսափում միջազգային հարթակներում կեղծել պատմությունն ու տարածել ապատեղեկատվություն:
Ցանկանում եմ ձեր ուշադրությունը հրավիրել Հայաստանի եւ Արցախի Հանրապետության շուրջ ձեւավորված նոր իրողությունների վրա:
Կարդացեք նաև
Ես, իսկապես, հավատում եմ, որ ԵԱՀԿ-ի շահերից եւ պատասխանատվությունից է բխում բարձրաձայնել եւ բացահայտել այն հանցագործությունները եւ միջազգային իրավունքի խախտումները, որոնք ինչպես Արցախում, այնպես էլ Հայաստանում իրականացվել են հայ ժողովրդի նկատմամբ: Ցավոք, ԵԱՀԿ-ն եւ նրա անդամ երկրները գերադասեցին լռել՝ չդատապարտելով եւ չկանխելով Ադրբեջանի ու Թուրքիայի սանձազերծած ագրեսիան: Եւ այս ձախողումը նոր բռնություններ եւ ուժի գործադրման նոր հնարավորություններ ծնեց:
Անվտանգությունը շարունակում է մնալ տարածաշրջանի ամենակենսական խնդիրը:
Շուրջ 10 ամիս ադրբեջանական զորքերը, հատելով ՀՀ պետական սահմանը, շարունակում են օկուպացված պահում Հայաստանի տարածքները: Եւ կրկին ԵԱՀԿ անդամ ոչ մի երկիր չդատապարտեց Հայաստանի ինքնիշխանության եւ տարածքային ամբողջականության նկատմամբ այս ոտնձգությունները:
Մարդկային զոհերի կողքին ահռելի են նաեւ մշակութային կորուստները: Ադրբեջանի էթնիկ զտումների եւ մշակութային արժեքների ոչնչացման քաղաքականությունը սպառնալիք է Հայաստանի եւ Արցախի բնակչությանը: Լեռնային Ղարաբաղի օկուպացված տարածքներում հայկական պատմամշակութային եւ կրոնական ժառանգության նկատմամբ վանդալիզմի, ոչնչացման եւ գիտական զեղծարարության դեպքերը շարունակական են:
ՄԱԿ-ի Արդարադատության միջազգային դատարանը հստակ պարտավորեցրել է Ադրբեջանին՝ «Ձեռնարկել բոլոր անհրաժեշտ միջոցները՝ կանխելու եւ պատժելու վանդալիզմի ու պղծման գործողությունները՝ ուղղված հայկական պատմամշակութային մշակութային ժառանգության, ներառյալ եկեղեցիների եւ այլ պաշտամունքի վայրերի, հուշարձանների, տեսարժան վայրերի, գերեզմանատների դեմ»:
Բայց ադրբեջանական իշխանությունները, կոպտորեն խախտելով անգամ միջազգային դատարանի որոշումը, ստեղծել են աշխատանքային խումբ, որը Արցախի Հանրապետության օկուպացված տարածքներում «հայկական հետքերը» վերացնելու նպատակ է հետապնդում:
Թուրքադրբեջանական ագրեսիայի հետեւանքով մոտ 90 հազար հայեր են տեղահանվել, այդ թվում՝ Շուշիից եւ Հադրութի շրջանից ու ժամանակավոր բնակություն հաստատել Հայաստանում: Հազարավոր կանայք եւ երեխաներ ամեն օր բախվում են հումանիտար ճգնաժամի հետեւանքներին: Հակառակ եռակողմ հրադադարի համաձայնագրին՝ նրանց անվտանգ վերադարձն իրենց բնակավայրեր չի իրականացվում, քանի որ այդ տարածքները այժմ գտնվում են Ադրբեջանի վերահսկողության ներքո:
Հարգելի գործընկերներ, Հայաստանում եւ նրա շուրջ ստեղծված իրավիճակը պահանջում է ավելի մեծ ներգրավվածություն: Եթե մենք նվիրված ենք եւ ազնիվ մեր տարածաշրջանում երկարատեւ խաղաղություն ու կայունություն հաստատելու մեր մտադրություններում, ապա պետք է հրատապ եւ արդյունավետ քայլեր ձեռնարկվեն:
Արցախի ժողովրդի ինքնորոշման իրավունքը չի կարող լուծված համարվել ագրեսիայի եւ պատերազմի միջոցով: Հակամարտությունը սպասում է իր արդար լուծմանը, որը պետք է ներառի նաեւ Արցախի կարգավիճակի որոշումը:
Մենք կոչ ենք անում Մինսկի խմբի համանախագահներին անհապաղ քայլեր ձեռնարկել՝ ԵԱՀԿ-ի կողմից ստացված մանդատի համաձայն, Լեռնային Ղարաբաղի հակամարտության կարգավորման բանակցային գործընթացը վերսկսելու համար»:
ԱԺ
