«Աշխատելու մեծ դաշտ ունենք, որպեսզի ամրապնդվի հայ ժողովրդի ներքին միասնականությունը։ Սա էական անհրաժեշտություն է այսօր։ Պատերազմից հետո առաջին անգամ է, որ խզում եմ նկատում սփյուռքի եւ հայրենիքի միջեւ՝ մի բան, որն ահազանգ է»,-«Հայ հեղափոխական դաշնակցության» 34-րդ ընդհանուր ժողովի ժամանակ այսօր լրագրողների հետ ճեպազրույցում հայտարարեց ՀՅԴ բյուրոյի ներկայացուցիչ Հակոբ Տեր-Խաչատուրյանը։
«Եթե անցյալում սփյուռքի մեծ հատվածներն իշխանության հանդեպ կեցվածք ունեին, ապա հիմա սկսել են վերածվել Հայաստան-սփյուռք հարցի։ Սրա դեմ պետք է պայքարել ամեն գնով։ Ամուր սփյուռքը գրավականն է հզոր հայրենիքի, եւ հայրենիքի գուրգուրանքը գրավականն է սփյուռքի կենսունակության։ Սրա նախաձեռնողն, անշուշտ, իշխանությունը պետք է լինի։ Եթե սա չեղավ, ապագան վտանգված է»,-համոզմունք հայտնեց Հակոբ Տեր-Խաչատուրյանը։
Նա նշեց, որ ՀՅԴ-ն այս հարցով երկխոսության մեջ է համահայկական կառույցների հետ, որպեսզի համազգային օրակարգ ձեւավորելու հարցում դիրքորոշումները հստակեցվեն։
Լուիզա ՍՈՒՔԻԱՍՅԱՆ
