«Պարտությունը հայ ժողովրդի հավաքական պարտությունը չէ, այլ իշխանության ղեկին հայտնված մի խումբ մարդկանց գործողությունների հետեւանքը․ ներքին-արտաքին ուժերի փորձերը՝ հայ ժողովրդին ներկայացնել թույլ եւ դատապարտված, պետք է ստանան համարժեք պատասխան»,- «Հայ հեղափոխական դաշնակցության» 34-րդ ընդհանուր ժողովում այսօր հայտարարեց ՀՅԴ գերագույն մարմնի ներկայացուցիչ, ԱԺ փոխնախագահ Իշխան Սաղաթելյանը։
Նրա խոսքով․ «Այս տարածաշրջանում ՀՅԴ-ն ողջ ներուժով ասելիք եւ անելիք ունի։ Պետք է չհաշտվել պարտության հետ եւ ձեւավորել դիմադրություն։ Մենք թշնամուն զիջելու հայրենիք չունենք։ Հայրենիքը պարտությունների տանող օրակարգերին պետք է դիմադրենք, հաղթահարենք պարտվածի հոգեբանությունը, ունենանք ազգային երազանք ու գնանք դրա հետեւից։ Այս օրերին այս կերպ մտածող մարդկանց ՀՀ-ում անվանում են «պաթոսով հայրենասերներ»։ Գիտե՞ք՝ ովքեր են դա ասում՝ մի խումբ անհայրենիք, ապազգային, անսրբություն տարրեր, որոնք մեր երկիրը բերեցին աղետի առաջ, որոնք ժողովրդավարությունը հակադրեցին անվտանգությանը, որոնք խաղաղությունն ու բարեկեցությունը պայմանավորում են զիջումներով, հետեւողականորեն թուլացնում դիմադրողականությունը»։
Իշխան Սաղաթելյանի բնորոշմամբ՝ իշխանությունն աղետաբեր է Արցախի, ՀՀ-ի եւ հայության համար առհասարակ․ «Պարտության եւ պատերազմի խորհրդանիշ ուժը չի կարող ապահովել խաղաղություն, անվտանգություն, բարեկեցություն։ Իրավիճակը պետք է փոխվի ժողովրդի վճռական կամքով եւ ազգային ուժերի առաջնորդությամբ։ Վարչախումբը հեռացվելու է։ Երկիրը պետք է ունենա ազգային իշխանություն, որը կապահովի երկրի սահմանների անձեռնմխելիությունը, կհասնի արժանապատիվ խաղաղության։ Նոյեմբերի իննից հետո աշխարհաքաղաքական սպառնալից իրավիճակում ենք, ինքնիշխանության կորստի վտանգ կա, մինչդեռ այս ամենի մեղավոր իշխանությունը սպասարկում է Ադրբեջանի եւ Թուրքիայի շահերը, անտեսում վերջիններիս հայատյացության քաղաքականությունը։ Հայ-թուրքական «հաշտեցման» գործընթացը պետք է կասեցվի»։
Կարդացեք նաև
Լուիզա ՍՈՒՔԻԱՍՅԱՆ
