Ուկրաինայում գիշերվա ընթացքում զգալի փոփոխություններ տեղի չեն ունեցել դիրքերում, ռուսական բանակն առաջ չի շարժվել, Կիևի և այլ խոշոր քաղաքների վրա գրոհ չի եղել: Կատաղի մարտեր են ընթացել Վասիլկով քաղաքի մոտ՝ Կիևից հարավ-արևմուտք, որտեղ գտնվում է ռազմաբազա: Կիևի մատույցներում հնչել են կրակոցներ: Մարտեր և կրակոցներ են եղել նաև երկրի հարավում՝ Նոր Կախովկում, Խերսոնում, Օդեսայի շրջանում:
ԱՄՆ-ը, ԵՄ-ը- Բրիտանիան, Կանադան և Ավստրալիան պաշտոնապես հայտարարել են պատժամիջոցների մասին, այդ թվում` պատժամիջոցներ Պուտինի դեմ:
ԱՄՆ նախագահ Ջո Բայդենը կարգադրել է արագացված կարգով Ուկրաինային տրամադրել 600 մլն դոլարի օգնություն, բացի այդ, Բայդենի վարչակարգը Կոնգրեսին խնդրել է հաստատել Ուկրաինային 6.4 մլրդ դոլարի մարդասիրական և ռազմական օգնության փաթեթը:
Ռուսաստանը վետո է դրել ՄԱԿ-ի անվտանգության խորհրդի բանաձևի վրա, որում դատապարտվում էր Ուկրաինայի վրա հարձակումը:
Կարդացեք նաև
Ուկրաինայի նախագահի մամուլի քարտուղար Սերգեյ Նիկոֆորովը շաբաթ առավոտյան հայտարարել է, որ Ուկրաինան նախկինի պես պատրաստ է Պուտինի հետ բանակցությունների:
«Մենք համաձայնություն ենք տվել Ռուսաստանի Դաշնության նախագահի առաջարկին: Հենց այս ժամերին կողմերը խորհրդակցություններ են անցկացնում բանակցային գործընթացի տեղի և ժամի վերաբերյալ: Որքան շուտ սկսվեն բանակցությունները, այնքան մեծ հնարավորություն կա վերադառնալու բնականոն կյանքին»,- գրել է Նիկիֆորովը:
Ամերիկյան Washington Post-ի տեղեկություններով՝ ԱՄՆ նախագահի աշխատակազմն Ուկրաինայի նախագահին առաջարկել է օգնություն՝ Կիևից նրան առավել անվտանգ վայր տարհանելու գործում, բայց նա հրաժարվել է:
Ինքը՝ Զելենսկին հայտարարել է, որ մայրաքաղաքում է և որպես ապացույց՝ լուսանկար է հրապարկել իր աշխատակազմի շենքի ֆոնին: «Այժմ ցանցում մեծ քանակությամբ կեղծ տեղեկություն կա, իբր ես կոչ եմ անում մեր բանակին վայր դնել զենքերը, և տարհանում է իրականացվում: Ուրեմն այսպես. այստեղ մենք ոչ մի զենք վայր չենք դնում, կպաշտպանենք մեր երկիրը»,- ասել է Զելենսկին:
Պատրաստեց Վիկտորյա ԱՆԴՐԵԱՍՅԱՆԸ
Աղբյուրներ՝ BBC, WASHINGTON POST
