Սյունիքի տարածաշրջանային քոլեջի տնօրեն Անժելա Մաքյանին առաջադրված մեղադրանքը փոփոխության չի ենթարկվել: Այս մասին Aravot.am-ի հարցմանն ի պատասխան՝ տեղեկացրել է Սյունիքի մարզի դատախազ Էդուարդ Հարությունյանը։
Տնօրենին մեղադրանք է առաջադրվել ՀՀ քրեական օրենսգրքի 314-րդ հոդվածի 1-ին մասով՝ 3 դրվագ (պաշտոնեական կեղծիքը) եւ 38-325-րդ հոդվածի 2-րդ մասով՝ 3 դրվագ (փաստաթղթեր, դրոշմներ, կնիքներ, ձեւաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը):
Ըստ ձեռք բերված ապացույցների՝ մեղադրյալը ուսումնական հաստատության ուսանողներին ընդունելու, նրանց հաճախելիության վերաբերյալ կազմվող փաստաթղթերում իր ենթակաների կողմից կատարվող գրառումների իսկության նկատմամբ հսկողություն իրականացնելու, կազմակերպության կանոնադրությամբ սահմանված կարգով ուսանողներին կարգապահական պատասխանատվության ենթարկելու, հաստատությունում ուսման վերականգնելու վերաբերյալ իրավաբանական նշանակություն ունեցող փաստերը հաստատող պաշտոնական փաստաթղթերում, ներառել է իրականությանը չհամապատասխանող տվյալներ:
«Կազմակերպելով դրանցում ակնհայտ կեղծ գրառումների կատարում՝ ստուգման գրքույկներում եւ դասամատյաններում գնահատականների նշանակումը եւ/կամ դասապրոցեսին բացակա լինելու պարագայում այդ մասին համապատասխան նշումներ չկատարումը՝ նա ստեղծել է իրավական հիմքեր ուսումնական եւ քննական պրոցեսին մասնակից չլինելու պարագայում կազմակերպությունից չհեռացնելու, ավելին՝ քննական շրջանը բարեհաջող ավարտելու վերաբերյալ: Արդյունքում այդ անձանց ուսման բնականոն ժամկետում տրամադրել են դիպլոմներ»,-նշված է դատախազի պատասխանի մեջ:
Կարդացեք նաև
Նախաքննությունը դեռ ընթացքի մեջ է, եւ դրա արդյունքներից է կախված՝ կառաջանա՞ մեղադրանքի ծավալը փոփոխելու անհրաժեշտություն, թե ոչ:
«Բավարար հիմքերի դեպքում որեւէ կաշկանդվածություն չունենք նաեւ այն փոքրացնելու: Կարեւորը տվյալ դեպքում իրականացվող քննության օբյեկտիվությունն է եւ դատավարության մասնակիցների իրավունքների պաշտպանությունը»,-նշել է Սյունիքի մարզի դատախազ Էդուարդ Հարությունյանը:
Նշենք, որ քոլեջի տնօրենի պարտականությունները դատարանի որոշմամբ այս պահին կասեցված են։
Սյունիքի մարզի դատախազի հետ Aravot.am-ի հարցազրույցի այլ մանրամասները՝ առաջիկայում։
Արմեն ԴԱՎԹՅԱՆ
