«Փորձում են դատական համակարգի անկախությունը սահմանափակել, հնարավոր ճնշումներ․․․փորձում են կոտրել դատական համակարգը։ Դատավորներն իշխանության մաս են, ունեն ողջամտություն, հետեւաբար՝ պետք է ներկա գտնվեն։ Չեմ կարծում, որ կա դատավոր, որն իր մեջ չի հասկանում, թե դատական համակարգի առաջ ինչ խնդիրներ կան։ Եթե պետք է ներկա չլինեն եւ առաջնորդվեն նեղ անձնական շահերով․․․չգիտեմ ինչ գնահատական տամ»,-լրագրողների հետ ճեպազրույցում այսօր ասաց Երեւանի ընդհանուր իրավասության դատարանի դատավոր Արման Հովհաննիսյանը։
Հիշեցնենք, որ այսօր պետք է ՀՀ դատավորների արտահերթ ընդհանուր ժողով տեղի ունենար․ օրակարգում քննարկման առարկա պետք է լինեին դատավոր Բորիս Բախշիյանի նկատմամբ իրականացվող քրեական հետապնդումը, ինչպես նաեւ՝ դատական իշխանության և դատավորների նկատմամբ իրականացվող ճնշումները։ Անհրաժեշտ քվորում, սակայն, չապահովվեց։
Արման Հովհաննիսյանը շեշտեց․ «Ժողովը չի կայանում ինչ որ մեկի համար, այն համակարգի համար է, որով ուզում ենք հասկանալ, թե ինչպես պաշտպանենք ինքներս մեզ, ի՞նչ լուծումներ տանք խնդիրներին»։
Հարցին՝ մտավախություն կա՞, որ դատավորների մի մասը խուսափում է երեւալուց, որ իշխանության թիրախում չհայտնվի, Արման Հովհաննիսյանը պատասխանեց․ «Կա այդ մտավախությունը, բայց ասեմ, որ խնդիրները, կարգապահական վարույթները, քրեական գործերը․․․ոչ մեկը երաշխավորված չի դրանցից, դրանք ամեն մեկին կարող են վերաբերել։ Ուստի դատավորները պետք է գան եւ փորձեն լուծումներ տալ։ Օրերից մի օր ամեն դատավորի համար էլ կարող են խնդիրներ առաջանալ։ Խոսում են 30-40 կոռումպացված դատավորների ցուցակի մասին՝ վարկաբեկելով բոլոր՝ մոտ 300 դատավորներին։ Եթե կան, տվեք անունները եւ համապատասխան գնահատական»։
Կարդացեք նաև
Նկատառմանն ի պատասխան, որ Նիկոլ Փաշինյանն արդեն տվել է «վնգստացող դատավորներ» գնահատականը, որին հիմա գործընթաց է հաջորդում, ուստի քաղաքական հրահանգի դեպքում ինչի՞ դեմ են պայքարում, Արման Հովհաննիսյանը հարցադրում արեց․ «Բա ի՞նչ անենք, չպայքարե՞նք։ Օրենքով սահմանված ընթացակարգերով պետք է պաշտպանենք մեր համակարգը։ Խնդիրն անձը չէ, այս գործընթացը մեր համակարգի դեմ է ուղղված։ Էլի են լինելու նման հայտարարություններ, փորձելու են հեղինակազրկել համակարգը»։
Լուիզա ՍՈՒՔԻԱՍՅԱՆ
