Այսօր Զորավար Անդրանիկի ծննդյան 157-րդ տարեդարձն է եւ նրա շիրիմի մոտ «Ազատագրական շարժման» անդամները քաղաքական հայտարարություն արեցին ու վարչապետ Նիկոլ Փաշինյանի հրաժարականի պահանջով ստորագրահավաքի մեկնարկը տվեցին:
Արա Զոհրաբյանն ընթերցեց հրաժարականի պահանջի հայտարարությունը. «Հանուն ազատ, ինքնիշխան եւ հզոր պետություն ունենալու նպատակի, հիշելով թուրքական ցեղասպան կեցվածքն ու ծավալապաշտական ձգտումներն առ այսօր չեն փոխվել, ինչը դրսեւորվում է մասնավորապես Հայաստանի շրջափակման, Հայոց ցեղասպանության ժխտման, Արցախի դեմ պատերազմում անմիջական ռազմական մասնակցություն ունենալու, ադրբեջանական շահն առաջ տանելու քաղաքականությամբ, գիտակցելով, որ հայ-թուրքական սահմանի բացմամբ առանց նախապայմանների կեղծ դրույթի ներքո իրականում թուրքական կողմն ակնկալում է հայկական կողմից նախապայմանների բացահայտ կամ քողարկված ընդունում: Մասնավորապես՝ Հայոց ցեղասպանության միջազգային ճանաչումից եւ պահանջատիրությունից հրաժարում, Կարսի անօրինական պայմանագրի ճանաչում, Արցախի ինքնորոշման իրավունքից հրաժարում: Համոզված լինելով, որ անարժանապատիվ եւ միակողմանի զիջումները չեն դադարեցնելու թուրք-ադրբեջանական ծավալապաշտական ցանկությունները եւ չեն ապահովագրելու ՀՀ-ին ու Արցախին հնարավոր նոր պատերազմից եւ կորուստներից, պատասխանատու համարելով գործող իշխանությունների վերնախավին, որը թալանը վերացնելու խոստումով գալով իշխանության՝ մսխել է ժողովրդի վստահությունը, թալանի դեմ պայքարի անվան տակ ժողովրդի փողերը յուրացնելու նոր ձեւ է կիրառել պարգեւավճարների տեսքով, ձեւավորել է նոր օլիգարխիկ համակարգ, Հայաստանն ու Արցախը փաստացի տարել է պարտության՝ մարդկային, տարածքային մեծ կորուստներով ու այժմ էլ անկարողունակ է պաշտպանել Հայաստանի եւ Արցախի շահը եւ համախմբել համայն հայությանը՝ հայտարարում ենք, որ չենք արտոնում Հայաստանի իշխանությանը մեր անունից բանակցել թուրք-ադրբեջանական կողմի հետ եւ պահանջում ենք Նիկոլ Փաշինյանի հրաժարականը»:
Հռիփսիմե ՋԵԲԵՋՅԱՆ
