«Հաղթանակ Ուկրաինային», «Վերջ Ռուսաստանի արյունոտ ագրեսիային»,- ԵԱՀԿ խորհրդարանական վեհաժողովի լիագումար և հանձնաժողովի նիստերը փետրվարի 24-ին անցան այս կարգախոսներով՝ լարված մթնոլորտում: ԵԱՀԿ խորհրդարանականները սուր ելույթներն ունեցան՝ դատապարտելով ՌԴ-ին Ուկրաինայի դեմ «արյունոտ ագրեսիայի», «նացիզմի», «անմեղ մարդկանց իրավունքների խախտումների», «միջազգային իրավունքի կոպիտ խախտումների» առնչությամբ: ԵԱՀԿ պատգամավորներն իրենց ելույթներում պահանջեցին ՌԴ-ին հրատապ կերպով դադարեցնել վայրագությունները և վերադառնալ դիվանագիտական հարթություն:
Իրավիճակը բավականին լարված էր ԵԱՀԿ անվտանգության հանձնաժողովի նիստի ընթացքում: Հանձնաժողովի նախագահ Ջոզելին Կինները հայտարարեց. «Դժվար է գնահատել, թե այս իրավիճակն ինչպես կազդի տարածաշրջանի և ընդհանրապես մեր կազմակերպության աշխատանքի վրա: Առանց այդ էլ Քովիդ համավարակը շատ լուրջ ազդեցություն էր ունեցել կազմակերպության գործունեության վրա: Այս իրավիճակում շատ կարևոր է ուժեղացնել մեր հավաքական միջոցները պաշտպանելու անվտանգությունը»:
Դատապարտելով ՌԴ-ի գործողությունները և կարևորելով պատժամիջոցների հնարավորության օգտագործումը ՌԴ-ի վրա` ճնշում գործադրելու առումով, անվտանգության հանձնաժողովի նախագահն ասաց. «Ռուսաստանը պետք է միանա քաղաքակիրթ աշխարհին և վերադառնա խաղաղության օրակարգին»: Բոլոր պատվիրակներն իրենց ելույթներում դատապարտում էին ՌԴ-ին և հայտարարում ՝ իրենց աջակցությունն են հայտնում Ուկրաինային և ուկրաինացի ժողովրդին:
Կարդացեք նաև
ԵԱՀԿ նախագահ, Լեհաստանի ԱԳ նախարար Զբիգնև Ռաուն հայտարարեց՝ մենք բոլոր հնարավոր սուր բառերով դատապարտում ենք ՌԴ-ի ագրեսիան Ուկրաինայի հանդեպ. «Ռուսաստանի գործողությունները դեմ են միջազգային իրավունքին: Մենք պահանջում ենք ռուսական կողմին հավատարիմ մնալ իր հանձնառություններին: Մենք ամբողջովին պաշտպանում ենք Ուկրաինայի ինքնիշխանությունը, տարածքային ամբողջականությունը և անկախությունը»:
Մինչ ԵԱՀԿ ԽՎ-ում ուկրաինական պատվիրակության ղեկավարը հայտարարում էր Ուկրաինայում տեղի ունեցող պատերազմական գործողությունների, խաղաղ բնակչության, քաղաքացիական ենթակառուցվածքների հրթիռակոծման մասին, ռուսական պատվիրակության անդամները վստահեցնում էին, որ ռազմական գործողությունները բացառապես կատարվում են Դոմբասի ժողովրդի պաշտպանության համար:
Տաթև ՀԱՐՈՒԹՅՈՒՆՅԱՆ
