Ermenihaber. Թուրքիայի ԱԳՆ-ը Ռուսաստանի կողմից Ուկրաինայի դեմ սկսված ռազմագործողության վերաբերյալ հայտարարություն է տարածել, որում շեշտվում է, որ Անկարան անընդունելի է համարում և մերժում է ՌԴ-ի սկսած ազմական գործողությունը:
«Այս հարձակումը ոչ միայն անվավեր է դարձնում Մինսկի համաձայնագրերը, այլև միջազգային իրավունքի ծանր խախտում է, և լուրջ սպառնալիք է ներկայացնում մեր տարածաշրջանի և աշխարհի անվտանգության համար: Թուրքիան, որ հավատում է երկրների տարածքային ամբողջականությունը և ինքնիշխանությունը հարգելու անհրաժեշտությանը, դեմ է զենքով սահմանները փոխելուն»,- ասվում է հայտարարության մեջ:
Դրանում նաև Ռուսաստանին կոչ է արվում վայրկյան առաջ դադարեցնել «անօրինական գործողությունները» և աջակցություն է հայտնվում Ուկրաինայի քաղաքական միասնության, ինքնիշխանության և տարածքային ամբողջականությանը:
Թուրքիայի նախագահ Ռեջեփ Թայիփ Էրդողանը փետրվարի 23-ին հեռախոսազրույց է ունեցել Ռուսաստանի նախագահ Վլադիմիր Պուտինի հետ: Թուրքիայի նախագահականի հանրային կապերի վարչության հաղորդմամբ՝ Էրդողանը շեշտել է, որ միշտ մեծ կարևորություն է տվել տարածաշրջանային խնդիրների հարցով Պուտինի հետ հիմնած սերտ երկխոսությանը՝ ավելացնելով, որ տեսել են դրա դրական արդյունքներն, և ինքը վճռական է այդ մոտեցումը շարունակելու հարցում:
Կարդացեք նաև
Էրդողանը շեշտել է, սակայն, որ իրենք չեն ճանաչում Ուկրաինայի ինքնիշխանությանն ու տարածքային ամբողջականությանը հակասող քայլերը, և դա իրենց համար սկզբունքային մոտեցում է: Թուրքիայի նախագահը կարևորել է նաև Մինսկի համաձայնագրերի հիման վրա արդյունքի հասնելու կարևորությունը:
Էրդողանը համոզմունք է հայտնել, որ խնդրի սրացումը և բախումները ոչ ոքի օգուտ չեն բերի՝ ավելացնելով, որ իրենք կարևորում են դիվանագիտական շփումների ու բանակցությունների շարունակումը: Նա հերթական անգամ ասել է, որ լարվածության թուլացման և խաղաղության պահպանման համար իրենք պատրաստ են անել այն ամենը, ինչը կախված կլինի իրենցից:
Թուրքիայի նախագահը, նշելով, որ իրենք այս խնդիրը դիվանագիտական ճանապարհով լուծելու կոչ են անում, ընդգծել է, որ Թուրքիան ՆԱՏՕ-ի ներսում էլ կառուցողական դիրքորոշում է որդեգրել:
Վերջում էլ Էրդողանը հիշեցրել է, որ թուրքական կողմը ամենասեղմ ժամկետներում սպասում է Պուտինի այցին:
