«Այս մարդիկ չգիտեն, թե ինչ են միջազգային հարաբերությունները, խնդիրները, չգիտեն, թե ինչ հակազդեցություն է հնարավոր տալ։ Միակ հույսս այն է, որ այս պահին ճակատագրական սխալ չանեն։ Լավատես չեմ, որ կանեն մի բան, որը երկրի համար դրական իրավիճակ կունենա»,-խորհրդարանում լրագրողների հետ ճեպազրույցում այսօր ասաց «Պատիվ ունեմ» խմբակցության պատգամավոր Հայկ Մամիջանյանը՝ անդրադառնալով Ուկրաինա ՌԴ ռազմական ներխուժման իրավիճակում ՀՀ իշխանության կողմից հնարավոր անելիքներին։
Հաշվի առնելով այն հանգամանքը, որ իրավիճակին զուգահեռ՝ հանդիպել են ՀՀ-ի եւ Թուրքիայի ներկայացուցիչները, Հայկ Մամիջանյանը շեշտեց․ «Հայկական կողմն առնվազն պետք է ունակ լինի դիստանցավորել հայ-թուրքական հարաբերությունների կարգավորման գործընթացը Ուկրաինայի շուրջ ստեղծված իրավիճակից։ Ինչում ես խիստ կասկածում եմ։ Երկու օր առաջ Եվրանեսթի բյուրոն վտանգավոր հռետորիկայով հայտարարություն ընդունեց եւ այդպես էլ չիմացանք՝ Մարիա Կարապետյանն ինչպե՞ս է քվեարկել։ Բյուրոյի նիստում ընդդիմությունը չունի ներկայացվածություն։ Ասաց, որ կողմ չի եղել, բայց մենք փաստական ապացույց չունենք։ Ձեռնպահի հնարավորություն կա, իսկ ՀՀ-ն «վետո»-ի իրավունք ունի։ Իշխանությունը հստակ չի ասում, թե ինչ է արել»։
Հարցին, թե ՌԴ-Ուկրաինա հակամարտությունում Ադրբեջանի կողմից ի՞նչ հնարավոր վտանգներ է պետք ակնկալել մեր հանդեպ, պատգամավորն այսպես պատասխանեց․ «Անկախ ուկրաինական կոնֆլիկտից՝ միշտ հնարավոր է, որ Ադրբեջանն օգտվի առիթից, որովհետեւ Նիկոլ Փաշինյանի համար հարց է՝ թուրքերն արդյոք ուզո՞ւմ են մեզ ցեղասպանել, թե ոչ․․․Մենք պատմությունը լավ գիտենք։ Չեմ կարծում, թե առիթներ են պետք, որպեսզի Ադրբեջանն ապացուցի իր արյունարբու մոտեցումը մեր հանդեպ»։
Լուիզա ՍՈՒՔԻԱՍՅԱՆ
