Ուկրաինայի նախագահ Վլադիմիր Զելենսկին հայտարարել է, որ խզում են դիվանագիտական հարաբերությունները Ռուսաստանի հետ:
«Այս առավոտը մտավ պատմության մեջ, բայց այդ պատմությունը միանգամայն տարբեր է մեր երկրի և Ռուսաստանի համար: Եվ մենք դադարեցնում ենք դիվանագիտական հարաբերությունները Ռուսաստանի հետ»,- ասել է նա ճեպազրույցում:
Զելենսկու գրասենյակից հայտնել են, որ ռուսական ագրեսիայի հետևանքով ուկրաինական կողմից զոհվել է ավելի քան 40 զինծառայող: Այնուամենայնիվ, նշվում է, որ ռուսական հարվածները լուրջ վնաս չեն հասցրել բանակի մարտունակությանը:
Իր հերթին Բելառուսի նախագահ Ալեքսանդր Լուկաշենկոն հայտարարել է, որ Բելառուսն ու Ռուսաստանը համատեղ քննարկում են Դոնեցկի և Լուգանսկի հանրապետությունները ճանաչելու հարցը:
Կարդացեք նաև
«Մենք պայմանավորվում են Պուտինի հետ՝ ինչ անել, որպեսզի լավ լինի թե՛ Ռուսաստանի, թե՛ Բելառուսի համար: Բայց դա կլինի համատեղ որոշում»,- ասել է նա:
Լուկաշենկոն նաև ասել է, որ պատրաստ է Մինսկում հյուրընկալել ռուս-ուկրաինական բանակցություններ: Նա նշել է, որ, իր տեղեկություններով, Ռուսաստանը նման բանակցությունները կհամաձայնի միայն այն դեպքում, եթե դրանք հանգեցնեն հստակ լուծումների:
Քիչ առաջ հայտարարություն է տարածել Եվրամիությունը՝ դատապարտելով Ռուսաստանի գործողությունները:
«Եվրամիությունն ամենախիստ կերպով դատապարտում է Ռուսաստանի Դաշնության զինված ուժերի ներխուժումն Ուկրաինա: Մենք նաև դատապարտում են Բելառուսի ներգրավվածությունը Ուկրաինայի դեմ այս ագրեսիայում և կոչ ենք անում նրան հետևել իր միջազգային պարտավորություններին»:
ԵՄ-ը նաև կոչ է անում Ռուսաստանի նախագահ Վլադիմիր Պուտինին անհապաղ դադարեցնել ռազմական գործողությունները և առանց նախապայմանների հետ քաշել զորքերը և սպառազինությունը Ուկրաինայի ամբողջ տարածքից:
«Ռուսաստանի ռազմական հարձակումն Ուկրաինայի՝ անկախ և ինքնիշխան երկրի տարածքի դեմ միջազգային իրավունքի աղաղակող խախտում է… Ռուսաստանը լիարժեք պատասխանատվություն է կրում ագրեսիայի այդ գործողության և դրա հետևանքով առաջացած զոհերի համար»,- ասվում է հայտարարության մեջ:
Օդեսայի իշխանությունները հայտնում են, որ Լիպեցկոյե գյուղում զոհվել է 18 մարդ, այդ թվում 10 կին, ևս 6 մարդ տեղափոխվել է հիվանդանոց:
Պատրաստեց Վիկտորյա ԱՆԴՐԵԱՍՅԱՆԸ
Լուսանկարում՝ Լուկաշենկոն եւ Զելենսկին 2019–ի հոկտեմբերին
ԱՂԲՅՈՒՐՆԵՐ՝ UNIAN, BBC, TASS
