«Քրեական գործ հարուցելու հիմքն ավելի քան ակնհայտ էր»,- ՀՀ ԱԺ պատգամավորներ Արծվիկ Մինասյանի և Աննա Մկրտչյանի բողոքի քննության ընթացքում դատարանի դահլիճում հայտարարեց ՀՀ ԱԺ ««Պատիվ ունեմ» խմբակցության պատգամավոր Աննա Մկրտչյանի ներկայացուցիչ Արթուր Մանուկյանը:
Հիշեցնենք՝ օգոստոսի 24-ին ՀՀ ԱԺ-ում տեղի ունեցած միջադեպի առնչությամբ քրեական գործ չհարուցելու դատախազության որոշման դեմ ԱԺ «Հայաստան» խմբակցության պատգամավոր Արծվիկ Մինասյանը եւ «Պատիվ ունեմ» խմբակցության պատգամավոր Աննա Մկրտչյանը բողոք են ներկայացրել:
Փետրվարի 24-ին տեղի ունեցավ այս գործով վերջին դատական նիստը, որի ընթացքում հետազոտվեցին դեպքի տեսագրությունները:
Այնուհետև եզրափակիչ ելույթով հանդես եկավ Արթուր Մանուկյանը: Նա պնդեց, որ բոլոր հիմնավոր փաստերը կային, որպեսզի քրեական գործ հարուցվեր: Փաստաբանն ասաց. «Քննչական մարմինը և դատախազությունը կայացրել են ոչ օրինական և ոչ հիմնավոր որոշումներ: Դրանք, իմ գնահատմամբ, քաղաքական որոշումներ էին, այլ ոչ թե իրավական»:
Կարդացեք նաև
Փաստաբանը նաև մտահոգություն հայտնեց դատարանի վրա հնարավոր ճնշումների կապակցությամբ: Նա մեզ հետ զրույցում ասաց՝ կարծես դա դատավորին դուրս չեկավ և այդ մասով իմ ելույթն ընդհատեց:
Դատարանը գնաց խորհրդակցական սենյակ: Որոշումը կհրապարակվի այսօր՝ 14.50-ին:
Արթուր Մանուկյանը հստակեցրեց՝ այս գործով այլ ընթացակարգ չկա. դատարանը կամ պետք է բողոքը բավարարի կամ մերժի, մասնակի բավարարման ընթացակարգ չկա:
Տաթև ՀԱՐՈՒԹՅՈՒՆՅԱՆ
