2022 թ․ փետրվարի 22-ին «Արմենիա Մարիոթ» հյուրանոցի առջև ՀՅԴ Հայաստանի երիտասարդական միության կողմից կազմակերպվել էր հավաք, որի նպատակն էր ՀՀ-ում գտնվող Ադրբեջանի հանրապետության երկու պատգամավորներին ներկայացնել Ադրբեջանի իշխանություններին հասցեագրված պահանջը՝ անմիջապես բաց թողնել հայ ռազմագերիներին և հեռանալ հայկական օկուպացված տարածքներից[1]:
Չնայած հավաքի խաղաղ բնույթին, ոստիկանության պարեկապահակետային ծառայության գնդի 3-րդ հատուկ գումարտակի ծառայողները («կարմիր բերետներ») կիրառեցին կոպիտ, անհամաչափ ուժ և բերման ենթարկեցին 25 անձի։ Բերման ենթարկված հավաքի մասնակիցներից մեկը ոստիկանության գործողությունների հետևանքով ստացավ ձեռքի կոտրվածք և տեղափոխվեց բժշկական հաստատություն[2]։ Հավաքի մասնակիցներից բացի բերման ենթարկվեց նաև «Երկիր Մեդիա» հեռուստաընկերության լրագրող Ա․ Նահապետյանը։ Ըստ վերջինիս՝ ոստիկանության ծառայողները առգրավել էին իր հեռախոսը և դրանից ջնջել մասնագիտական աշխատանքի հետ կապված նյութեր[3]։
Ավելի ուշ ՀՀ ոստիկանությունը հաղորդեց, որ հավաքի մասնակիցների գործողությունների առթիվ հարուցվել է քրեական գործ՝ խուլիգանության հատկանիշներով[4]։
Նշված հավաքի ընթացքում ոստիկանության կողմից մասնակիցների նկատմամբ կատարված գործողությունները, կիրառված անհամաչափ ուժը, ինչպես նաև լրագրողի գործունեությանը խոչընդոտելը հանդիսանում են հավաքների ազատության իրավունքի կոպիտ խախտում։
Կարդացեք նաև
Հայաստանի Հելսինկյան կոմիտեն կոչ է անում ՀՀ իրավապահ մարմիններին՝ ձեռնպահ մնալ հավաքների ազատության իրավունքի խախտումներից և անհամաչափ սահմանափակումներից, ինչպես նաև պատասխանատվության ենթարկել լիազորություններն անցած և կոպիտ խախտումներ թույլ տված բոլոր ոստիկանության ծառայողներին։
[1] Տե՛ս ՀՅԴ ՀԵՄ հայտարարությունը, 23․02․2022 թ․, https://www.facebook.com/arfhemofficial/posts/3238576939748946
[2] ««Մարիոթ»-ում միջադեպի, 25 անձի բերման ենթարկելու վերաբերյալ Ոստիկանության պարզաբանումը»
[3] «Ոստիկանները խոչընդոտել են լրագրողի աշխատանքը և բռնի ուժ կիրառել. «Երկիր մեդիա» հեռուստաընկերությունը պահանջում է պատժել մեղավորներին. Հայտարարություն», Երկիր Մեդիա, 23․02․2022 թ․, https://yerkirmedia.am/hy/article/2022/02/23/53848
[4] Տե՛ս ՀՀ ոստիկանության պարզաբանումը, 23․02․2022 թ․, https://bit.ly/3HaooaJ
