«Արդեն երկրորդ կարեւոր հարցի առնչությամբ քաղաքական մեծամասնությունը ձախողեց արտահերթ նիստը։ Մեր առաջին նախաձեռնությունը սահմանագծման-սահմանազատման գործընթացին էր վերաբերում»,-խորհրդարանում լրագրողների հետ ճեպազրույցում այսօր ասաց «Հայաստան» դաշինքի պատգամավոր Իշխան Սաղաթելյանը։
Հիշեցնենք, որ ընդդիմությունն արտահերթ նիստ էր հրավիրել՝ օրակարգում Շուշիի հռչակագրի դատապարտող հայտարարությամբ, սակայն ՔՊ-ն քվորում չի ապահովում։
«Օկուպացված Շուշիում ընդունված փաստաթուղթն անընդունելի է մեր համար։ Սա է մեր ասածը, մինչդեռ իշխանությունն առանց հիմնավորման բոյկոտեց՝ վավերացնելով այդ փաստաթուղթը եւ սպասարկելով Ադրբեջանի եւ Թուրքիայի շահերը։ Եթե սրանից հետո իշխանությունն ասի, թե հայ-թուրքական հարաբերություններում նախապայման չկա, ապա դա երեսպաշտություն է եւ ժողովրդին ձեռք առնելու փորձ։ Ավելին՝ կարծում եմ, որ երկու կողմերը հայ-թուրքական հաշտեցման փաստաթուղթ են քննարկում, եւ դրանում ոտնահարված են հայկական կողմի շահերը»,-նշեց Իշխան Սաղաթելյանը։
Կարդացեք նաև
Նա նաեւ ասաց, որ ՀՅԴ-ն լինելու է Հայաստանի թրքացման դեմ պայքարի առաջամարտիկը, իսկ սփյուռքը եւ ՀՀ-ն պառակտելու փորձերն իշխանության ձեռագիրն են։
Լուիզա ՍՈՒՔԻԱՍՅԱՆ
