Երեւանում տեղի ունեցած Եվրանեսթի նստաշրջանի ընթացքում բյուրոյի նիստի ժամանակ քվեարկության է դրվել մի փաստաթուղթ, որը մինչեւ այս պահը հրապարակված չէ, եւ հայաստանյան պատվիրակության ղեկավարից որեւէ կերպ հնարավոր չի եղել պարզել, թե ինչ թուղթ է դա եւ հայկական պատվիրակությունն ինչ դիրքորոշում է հայտնել։ Այս մասին այսօր ԱԺ-ում լրագրողների հետ հանդիպմանը հայտարարեց նստաշրջանին մասնակցած «Հայաստան» դաշինքի պատգամավոր Արթուր Ղազինյանը։
«Ասում են՝ դեմ ենք, հետո ասում են՝ ձեռնպահ։ Մինչեւ վերջ պարզ չէ»,-նշեց Ղազինյանը։
Նրա խոսքով՝ մտահոգիչ է այն փաստը, որ պատերազմից հետո ադրբեջանցի պատգամավորները գտնվում են ՀՀ-ում, մինչդեռ 2012թ․-ից բոյկոտել էին Եվրանեսթի շրջանակում ՀՀ այցերը․ «Իրենց բավականին ազատ էին զգում, մեկ նիստ վարելու հնարավորություն ստացան։ Վրդովվեցնող է սա, որովհետեւ ՀՀ-ում տիրող բարոյահոգեբանական մթնոլորտը հաշվի առնելով՝ ադրբեջանցիները չպետք է գային Երեւան։ Եթե կա միջազգային պարտավորություն Եվրանեսթի նիստերը կազմակերպելու, ապա դա կարելի էր անել առցանց ռեժիմով եւ ադրբեջանական պատվիրակությանը հնարավորություն չտալ գալ ՀՀ, նկարվել տարբեր տեղերում, հրապարակել դրանք սոցցանցերում եւ ողջույններ հղել իրենց երկրում ընդունված տերմինաբանությամբ։ Այս փաստը մեր համար անընդունելի էր, բայց ընդդիմությունը միասնական ուղերձներ հղեց ադրբեջանական էլիտային։ Իրենց ճակատին ասվեց, որ Արցախը երբեք չի լինելու Ադրբեջանի կազմում, Եվրախորհրդարանի պատգամավորներն էլ փաստեցին, որ չեն ընդունում պատերազմի արդյունքները»։
Կարդացեք նաև
Լուիզա ՍՈՒՔԻԱՍՅԱՆ
