Այսօր ԱԺ աշխատանքի եւ սոցիալական հարցերի հանձնաժողովի նիստում քննարկվեց «ԱՊՀ պետությունների բնակչության զբաղվածությանն աջակցելու ոլորտում համագործակցության մասին» համաձայնագիրը վավերացնելու հարցը:
Աշխատանքի եւ սոցիալական հարցերի փոխնախարար Ռուբեն Սարգսյանը նշեց, որ համաձայնագրի նպատակն է ընդհանուր աշխատաշուկա ձեւավորել, գործազրկության մակարդակը նվազեցնել, ապօրինի միգրացիան կանգնեցնել:
Թադեւոս Ավետիսյան
«Հայաստան» խմբակցության պատգամավոր Թադեւոս Ավետիսյանը հարցրեց՝ դուք կարեւորո՞ւմ եք զբաղվածության ոլորտը, թե՞ ոչ. «Բա եթե կարեւորում եք, 2020-ից կորոնավիրուսը, պատերազմը, գնաճով աղքատության խնդրի սրումը, որը ուղիղ ազդեցություն է ունեցել աշխատաշուկայի վրա, այս վիճակում ի՞նչ եք գցել-բռնել, որ 2022-ին զբաղվածության ոլորտի աջակցության ծրագրերին պետբյուջեով հատկացված գումարները 25%-ով կրճատել եք ՝500 մլն դրամով: Յանի եղածը շատ էր՝ 2 մլրդ, կրճատում եք անում: Սա վերաբերմո՞ւնք է, թե՞ ֆիննախի պարտադրանքն եք կատարում»: Նա ասաց, որ եթե այդ ծրագրերը վատն էին, դրա համար չեն անում, թող լավը առաջարկեն ու անեն:
Զարուհի Բաթոյան
Նախկին նախարար, ՔՊ պատգամավոր Զարուհի Բաթոյանն ասաց, որ զբաղվածության ծրագրերը պետք է վերանայվեն ու արդյունավետությունը պետք է բարձրանա:
Կարդացեք նաև
Աղվան Վարդանյան
Նախկին նախարար, «Հայաստան» խմբակցության պատգամավոր Աղվան Վարդանյանն էլ հակադարձեց՝ եթե 2022-ի համար բյուջեի հատկացումները 2 մլրդ են, իրենք 18 մլրդ-ի հատկացումներ էին անում նախկինում:
ՔՊ պատգամավոր Լենա Նազարյանն իր ելույթում նշեց. «Զբաղվածության ծրագրերով չէ, որ Հայաստանում զբաղվածությունը շատանալու է: Հայաստանում այդ ծրագրերը այդ հարցը չեն լուծում: 10-ից ավելի տարիներ է, որ նախարարությունն իրականացնում է զբաղվածության ծագրեր, բայց դա կարծես թե չի ազդում զբաղվածության վրա: Դրանք ավելի շատ նախարարության համար են զբաղվածություն ապահովել, որտեղ դուք, պարոն Ավետիսյան, երկար ժամանակ աշխատել եք: Կային ծրագրեր, որոնք մի քանի միլիոն բյուջե ունեին, բայց ունեին 16, 30 շահառու: Մի մարզային ՀԿ իր մի ծրագրով ավելի շատ մարդկանց էր սպասարկում, քան նախարարության զբաղվածության ծրագրերը ու ես շատ ուրախ եմ, մեր քաղաքական պատվերն ու պահանջն էլ է դա, որ վերանայվեն այդ ծրագրերը: Եթե դրանք անարդյունավետ են, պետք է հրաժարվել դրանից, որովհետեւ դրանք բեռ են նախարարության համար: Նախարարությունը չպետք է վարչական ռեսուրս վատնի»:
Թադեւոս Ավետիսյանն էլ դժգոհեց, որ մինչեւ խոր ծերություն այսպես պետք է քննարկեն ծրագրերը վերանայելու մասին, բայց արդյունք չեն տեսնում: Եվ հետո, նա ընդգծեց, որ այդ ծրագրերով աշխատանքի են ընդունվում հաշմանդամություն ունեցող մարդիկ:
Համաձայնագիրը դրական եզրակացություն ստացավ:
Հռիփսիմե ՋԵԲԵՋՅԱՆ
