Այսօր ՔՊ պատգամավոր Գեւորգ Պապոյանը ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի հանձնաժողովի նիստում ներկայացրեց «Հարկային օրենսգրքում» փոփոխությունների նախագիծ:
«Կրթության մասին» օրենքով, ԲՈՒՀ-երը տվյալ ուսումնական տարում անվճար ընդունված ուսանողների թվի 10 տոկոսի չափով իրենց միջոցների հաշվին, ըստ առաջադիմության, փոխհատուցում են վճարովի ուսուցման համակարգի ուսանողների ուսման վարձը: «Բարձրագույն եւ հետբուհական մասնագիտական կրթության մասին» օրենքով՝ բուհը վճարովի համակարգում սովորող ուսանողական համակազմի առնվազն 10 տոկոսին՝ ուսանողների վարձավճարներից գոյացած բյուջեի առնվազն 7 տոկոսի չափով, իր միջոցների հաշվին՝ հիմք ընդունելով բարձր առաջադիմությունը եւ սոցիալական խումբը, իրականացնում է ուսանողական նպաստի ձեւով ուսման վարձի մասնակի փոխհատուցում: Միաժամանակ, Հարկային օրենսգրքի համաձայն, այդ փոխհատուցումները ծախսագրելու եւ եկամուտ չհամարելու առավելագույն սահմաններ են ամրագրված: Գործնականում լինում են դեպքեր, երբ փաստացի փոխհատուցումներից օգտվողների թիվը ավելին է, քան Հարկային օրենսդրությամբ սահմանված է: Բուհի կատարած ծախսի որոշակի մասը հարկման նպատակով չի ընդունվում:
Հաշվի առնելով, որ ապրիլյան պատերազմ է եղել, 44-օրյա պատերազմ է եղել եւ պատերազմի մասնակից ուսանողների թիվը մեծացել է, ստեղծվել է այնպիսի վիճակ, երբ բուհերը էականորեն ավելի շատ ուսանողների համար են ուսման վճար փոխհատուցում: Օրինակ, ԵՊՀ-ի պարագայում՝ ուսանողների շուրջ 26 տոկոսը, հետեւաբար գերազանցող 10 տոկոսի մասով առաջանում են շահութահարկի եւ եկամտային հարկի լրացուցիչ հարկային պարտավորություններ: Այսինքն` ստեղծվել է մի իրավիճակ, երբ բուհերը պետք է որոշում կայացնեն 10 տոկոսը գերազանցող շահառուներին արդյոք տրամադրե՞լ ուսման վարձի սահմանված չափով փոխհատուցում եւ կուտակել հարկային պարտավորություններ, թե՞ փոխհատուցումները իրականացնել մասնակի կամ առհասարակ չիրականացնել:
Նախագծով առաջարկվում է Հարկային օրենսգրքով սահմանված այդ 10 տոկոս շեմը դարձնել մինչեւ 25 տոկոս:
Կարդացեք նաև
Նախագիծը դրական եզրակացություն ստացավ: «Կողմ» քվեարկեց նաեւ ընդդիմությունը:
Հռիփսիմե ՋԵԲԵՋՅԱՆ
