Հիվանդանոցների ե՛ւ սոմատիկ, ե՛ւ ինտենսիվ թերապիայի բաժանմունքներում հայտնված քաղաքացիների շատ փոքր տոկոսն են կազմում պատվաստվածները: Այս մասին այսօր մամուլի ասուլիսում նշեց Ինֆեկցիոն հիվանդությունների ազգային կենտրոնի գլխավոր բժիշկ Նաիրա Ստեփանյանը:
Ըստ նրա, ծայրահեղ ծանր եւ ծանր վիճակում են 65-ից բարձր տարիքային խմբերում գտնվող հիվանդները. «Վերջին ալիքի ժամանակ բավականին շատ հոսպիտալացումներ եղան նաեւ 85-ից բարձր տարիքային խմբերում: Երեկ 95 տարեկան մարդու համար էին զանգահարել: Եթե «օմիկրոնը» թեթեւ է ընթանում երիտասարդների, պատվաստվածների շրջանում, ապա մեծահասակ եւ քրոնիկ հիվանդություններ ունեցող տարիքային խմբում գտնվող մարդիկ մշտապես գտնվում են ռիսկի խմբում: Այս տարիքային խմբի հիվանդները ծանր են տանում հիվանդությունը: Բացի դրանից՝ հոսպիտալացված 5 անձից 4-ը շաքարային դիաբետով բուժառուներ են»:
Նա հորդորեց կիրառել կանխարգելիչ միջոցառումներ:
Հարցին՝ արդյոք «օմիկրոնը» կորոնավիրուսի համավարակի վերջին «ակորդն» է, Ռոմելլա Աբովյանը պատասխանեց, որ «օմիկրոնը» թեթեւ է ընթանում պատվաստված բնակչության մոտ, բայց չպատվաստվածների մոտ կարող է ծանր ընթացք ունենալ. «Իսկ պանդեմիայի ավարտի մասին խոսելը վաղ է, նոր ենթատեսակի մասին շատ բան հայտնի չէ, դեռեւս ԱՀԿ-ն ուսումնասիրություն է իրականացնում այս ենթատեսակի էվոլյուցիան պարզելու համար»:
Կարդացեք նաև
Լուսինե ԲՈՒԴԱՂՅԱՆ
