Թուրքիայի նախագահ Ռեջեփ Թայիփ Էրդողանն անընդունելի է համարել Ռուսաստանի կողմից Դոնեցկի և Լուգանսկի չճանաչված հանրապետությունների ճանաչումը:
«Մենք ճգնաժամի հենց սկզբից անկեղծորեն փորձում էինք թուլացնել լարվածությունը: Վերջին իրադարձությունների վերաբերյալ մեր ԱԳՆ հայտարարության մեջ նշված էր, որ Ռուսաստանի որոշումը՝ ճանաչել այսպես կոչված Դոնեցկի և Լուգանսկի հանրապետությունները, հակասում են Մինսկի համաձայնագրերին: Ընդգծվել էր, որ այդ որոշումը քաղաքական միասնականության, Ուկրաինայի տարածքային ամբողջականության և ինքնիշխանության բացահայտ խախտում է: Ռուսաստանի այդպիսի որոշումը համարում ենք անընդունելի: Կրկին դիմում ենք կողմերին՝ կոչ անելով հարգել ողջամտությունն ու միջազգային իրավունքը»,- լրագրողներին ասել է էրդողանը:
Նրա խոսքով՝ Թուրքիան դրական է գնահատում Ուկրաինայի նախագահ Վլադիմիր Զելենսկու առաջարկը՝ ՄԱԿ-ի Անվտանգության խորհրդի նիստ հրավիրել Ուկրաինայի, Գերմանիայի և Թուրքիայի մասնակցությամբ: «Եթե այդ առաջարկը կիրառություն գտնի, մենք, իհարկե, դրանում կներգրավվենք: Պարոն Զելենսկու առաջարկը դրական քայլ է: Եթե ՄԱԿ ԱԽ անդամները և մյուս երկրները համաձայնեն դրան, ապա մենք անպայման կմասնակցենք նիստին»,- ասել է նա:
Էրդողանը նաև նշել է, որ Թուրքիան պետք է «լրացուցիչ նախազգուշական միջոցներ» կիրառի Ռուսաստանի այդ որոշումից հետո:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
