«Մեր վարորդները ծխում են, արագ են քշում, կանգառներում չեն կանգնում: «Կուստարնի» մեթոդներով վերահսկողությունը չի աշխատում: Մեզ նոր, ժամանակակից մեթոդներով վերահսկողություն է պետք, որպեսզի կարողանանք պատշաճ ծառայություններ մատուցենք քաղաքացիներին»,-այսօր Երեւանի քաղաքապետարանում տեղի ունեցած գործակարգավարական խորհրդակցության ժամանակ ասաց Երեւանի քաղաքապետ Հրաչյա Սարգսյանը, երբ քննարկվում էր «Փարքինգ Սիթի» ընկերության՝ հանրային տրանսպորտի կառավարման կենտրոնի նախագծային աշխատանքների կազմակերպման ընթացքի մասին հարցը:
Ընկերության տնօրենն ասաց, որ վատ նորություն ունի, բանակցությունների արդյունքում մրցույթը չի կայացել եւ պետք է նոր մրցույթ հայտարարեն:
Քաղաքապետը հետաքրքրվեց՝ երկրորդ մրցույթը ե՞րբ են հայտարարելու՝ նշելով, որ դա շատ կարեւոր նախագիծ է:
Կարդացեք նաև
Հրաչյա Սարգսյանի խոսքով. «Մամուլում շրջանառվում է, որ այդ 100 դրամը վարորդն ասում է՝ ինձ տվեք: Դե մի տվեք, ժողովուրդ ջան: Պայման ենք ստեղծել, 10 միլիարդ փող ենք ծախսել, ավտոբուսներ ենք բերել: 25 միլիոն եվրո կառավարության աջակցությամբ 100 հատ 12-մետրանոց ավտոբուսներ ենք բերելու: Համայնքային միջոցներով ուզում ենք 10-15 հատ տրոլեյբուս առնենք: Այդ գումարները հավաքվում է ձեր տված վճարներից, մի տվեք վարորդին այդ գումարը, 100 դրամը գցեք այդ մետաղընդունիչի մեջ: Ասում են՝ վարորդը մեղք է, բայց վարորդը 270 հազար դրամ աշխատավարձ է ստանում: Սահմանին կանգնած տղերքը 120-150 հազար դրամ են ստանում: Ու թող չբողոքեն ոչ մեկը: Այդ 100 դրամը որ տալիս եք, հետո մենք այդ վարորդին աշխատավարձ ենք տալիս»:
Հրաչյա Սարգսյանն ասաց, որ միասնական կառավարման համակարգ են ներդնում:
Լուսինե ԲՈՒԴԱՂՅԱՆ
