«Արտահերթ նիստն արդեն իսկ նախաձեռնված է՝ փետրվարի 23-ին, ժամը 12-ին։ Իշխող խմբակցության այսօրվա մոտեցումից հետո ենթադրում եմ, որ կարող են նիստը տապալել»,-լրագրողների հետ ճեպազրույցում այսօր հայտարարեց «Հայաստան» դաշինքի պատգամավոր Անդրանիկ Թեւանյանը։
Հիշեցնենք, որ ԱԺ արտաքին հարաբերությունների հանձնաժողովն այսօր չընդունեց նրա հեղինակած՝ Ադրբեջանի եւ Թուրքիայի խորհրդարանների կողմից «Շուշիի հռչակագրի» վավերացման կապակցությամբ դատապարտող հայտարարության նախագիծը։
«Այսօր ամոթալի եւ խայտառակ քաղաքական որոշման ականատես եղանք։ Չէի պատկերացնում, որ իշխող ուժն այսքա՜ն բացահայտ ողջունում է թուրքամետ քաղաքականությունը։ Մերժեց նախագիծը՝ կողմ արտահայտվելով Շուշիի հռչակագրին, «Զանգեզուրի միջանցքին»․․․սա «խաղաղասիրական» քաղաքականության դրսեւորում էր, որը բերելու է նոր ողբերգության։ Քաղաքացիները պետք է իմանան, որ հիմա ՀՀ իշխանությունը նախապատրաստում է 1915թ․-ի կրկնությունը»,-համոզմունք հայտնեց Անդրանիկ Թեւանյանը։
«Ուղերձ են տալիս թշնամուն, որ ամեն ինչ պատրաստ են զիջել հանուն «խաղաղության»։ Չի լինելու խաղաղություն։ Թշնամու նկրտումներն ավելանալու են։ Սա վատ ուղերձ է նաեւ մեր դաշնակիցներ ՌԴ-ին եւ Իրանին։ Նաեւ նրանց դեմ է ուղղված Շուշիի հռչակագիրը»,-հավելեց Անդրանիկ Թեւանյանը։
Կարդացեք նաև
Լուիզա ՍՈՒՔԻԱՍՅԱՆ
