Այսօր Հայաստանի գրողների միության նախաձեռնությամբ կազմակերպվել է ամենամյա միջոցառում` նվիրված Հովհաննես Թումանյանի ծննդյան ու Գիրք նվիրելու օրվան։
ՀԳՄ նախագահ, բանաստեղծ Էդվարդ Միլիտոնյանը լրագրողների հետ զրույցում նշեց, որ վերջին տարիներին փետրվարի 19-ը հանրապետության մարզերում, Արցախում և ՀՀ-ից դուրս հայաշատ վայրերում տոնվում է որպես Գիրք նվիրելու օր։ Եվ պատահական չէ, որ Հայաստանի գրողների միությունն ամեն տարի ձեռնամուխ է լինում այսօրինակ միջոցառումներ կազմակերպելուն։ Սա նաև լավ հնարավորություն է գրողի և ընթերցողի կապն ամուր պահելու համար։
«Գիրքն այն կենաց ծառն է, որը մեզ դարերով ավյուն է տվել»,-նշեց Էդվարդ Միլիտոնյանը, հավելելով, որ գիրքը մարդուն ապրեցնում է, ինչպես հացն ու ջուրը։
Գրքի տոնին հավաքվել էին նաև գրողներ, հրատարակիչներ, աշակերտներ, ընթերցողներ։ Հրատարակիչ, գրող, թարգմանիչ Վան Արյանը հավաքված մարդկանց շնորհավորեց այս կարևոր օրվա կապակցությամբ, խորհուրդ տվեց կարդալ որակյալ, արժեքավոր գրականություն։
Կարդացեք նաև
«Ծիծեռնակ» ամսագրի խմբագիր, բանաստեղծ Անուշ Վարդանյանը հավաքված աշակերտներին նվիրեց «Ծիծեռնակի» 2022 թվականի առաջին համարը, այնուհետև հորդորեց ստեղծագործել և թղթակցել ամսագրի հետ։
Հավելենք, որ միջոցառման ընթացքում գրողներն իրենց գրքերը նվիրեցին ներկաներին։
Վովա ԱՐԶՈՒՄԱՆՅԱՆ
Լուսանկարները` հեղինակի
