«Ընդհանուր առմամբ նախագծի քննարկումները կառուցողական մթնոլորտում են իրականացվել: Կարծում եմ՝ փաստաբանական համայնքն իր միասնականությամբ, համատեղ ձեռքբերումների համատեքստում կպահպանի իր դիրքերը, ինչպես՝ կար»,- լրագրողների հետ զրույցում այսպիսի կարծիք հայտնեց ՀՀ Փաստաբանների պալատի նախագահ Սիմոն Բաբայանը՝ անդրադառնալով «Փաստաբանության մասին» օրենքում փոփոխություններ և լրացումներ կատարելու մասին» օրենքի նախագծին:
Հիշեցնենք՝ Արդարադատության նախարարության «Օրենսդրության զարգացման և իրավական հետազոտությունների կենտրոն» հիմնադրամը՝ Արդարադատության նախարարի տեղակալ Գրիգոր Մինասյանի և Փաստաբանների պալատի նախագահ Սիմոն Բաբայանի և ոլորտի այլ մասնագետների մասնակցությամբ կազմակերպեց աշխատանքային քննարկում՝ ««Փաստաբանության մասին» օրենքում փոփոխություններ և լրացումներ կատարելու մասին» օրենքի նախագծի հանրային քննարկման արդյունքներով վերհանված առանձին հարցադրումները քննարկելու նպատակով:
Լրագրողների դիտարկմանը՝ այս փոփոխությունները թույլ են տալիս առանց հատուկ ուսուցման՝ դատավորներին և դատախազներին զբաղվել փաստաբանական գործունեությամբ, Սիմոն Բաբայանն արձագանքեց. «Այս ընթացքում իրականացվեցին բավականին երկար քննարկումներ: Արձանագրենք, որ դրանք բավականին կառուցողական էին այս առումով: Որոշակի դրույթներ կառավարման տեսանկյունից օպտիմալացվեցին: Ներկայացված է մի առաջարկ՝ ըստ որի բարդեցված քննության ընթացքում բազմամյա ստաժ ունենալու դեպքում անձը հնարավորություն կունենա քննություն հանձնելով, մուտքային այդ պայմանը բավարարելով՝ մուտք գործել փաստաբանական համայնք: Դա բացառիկ դեպքերում է»:
Կարդացեք նաև
Հարցին՝ իսկ ո՞ր դրույթները չեն ընդունվել իրենց կողմից, Սիմոն Բաբայանը պատասխանեց. «Առանցքային խնդիրներից մեկն էր այն, որ կառավարման համակարգում պետք է նախատեսվեր այնպիսի կարգավորում, որտեղ հնարավորություն կտրվեր փաստաբանական համայնքի անդամ չհանդիսացող անձանց մուտքը համայնք: Այդ տեսակետը մեզ համար ընդունելի չէ: Ընդհանուր առմամբ այդ հարցում եկանք համաձայնության, և կարգապահական վարույթների օպտիմալացման տեսանկյունից կարող ենք ասել, որ, իմ կարծիքով, մենք կգանք ընդհանուր հայտարարի»:
Տաթև ՀԱՐՈՒԹՅՈՒՆՅԱՆ
