«8-րդ գումարման խորհրդարանը աննախադեպ էր էթիկայի խախտումներով, այնպիսի խախտումներով, որ ոչ տեսել էինք, ոչ երեւակայել էինք, օրինակ, որ ՊՆ նախկին նախարարը, որ ֆրակցիայի ղեկավար է, կարող է շիշ շպրտել կամ ամբիոնի մոտից ելույթ ունեցող, խոսող պատգամավորին կարելի է գալ, քաշել ու հետո կարգավորել, դահլիճից դո՞ւրս հանել այդ պատգամավորին, թե՞ թողնել դահլիճի ներսում: Մենք անընդհատ զարմանում էինք՝ է՞լ ուր կարող են հասնել»,- այսօր «Մեդիա կենտրոնում» 8-րդ գումարման ԱԺ-ի երկրորդ նստաշրջանի դիտարկման արդյունքները ներկայացնելիս ասաց «ԱԺ մոնիտորինգ» ծրագրի խմբագիր Մարիամ Բարսեղյանը:
Նա նշեց, որ անգամ այս աղմկոտ դեպքերի պարագայում 3 խմբակցություններից որեւէ մեկը հարկ չհամարեց հանդես գալ էթիկայի հանձնաժողով ստեղծելու նախաձեռնությամբ, բացի այդ, լսումներ կազմակերպելու հնարավորությունից օգտվել են երկու անգամ ու այս պարագայում խոսել ԱԺ-ի վերահսկողական գործառույթի մասին՝ ճիշտ չէ:
«Պատիվ ունեմ» խմբակցության քարտուղար Հայկ Մամիջանյանն ասաց, որ իրենց խմբակցության պատգամավոր Թագուհի Թովմասյանը նախաձեռնել է էթիկայի հանձնաժողով ստեղծել՝ ՔՊ պատգամավոր Վահագն Ալեքսանյանի՝ լրագրողներին «վերբալ մարմնավաճառներ» ասելու արտահայտության հետ կապված:
Ծրագրի պատասխանատուները հիշեցրին, որ այս պահին քննարկում են 2-րդ նստաշրջանի արդյունքները, այդ ընթացքում 7 միջադեպ է եղել ու էթիկայի հանձնաժողով չի ստեղծվել:
Կարդացեք նաև
Լսումներ իրականացնելու գործիքից չօգտվելու համար էլ Մամիջանյանն ասաց, որ շուտով կազմակերպելու են մի նախագծի հետ կապված:
«Հայաստան» խմբակցության քարտուղար Արծվիկ Մինասյանն էլ Մարիամ Բարսեղյանին հակադարձեց. «Դուք էլ եք շարունակում «նախկիններն են մեղավոր» կոնցեպտը, դա արդեն հոգնեցրել է բոլորին: Իշխանության է մի ուժ ու մի անձ, ով մշտապես քննադատել է օրվա իշխանության վարքագիծը նույն բացասական երեւույթների հետ կապված, բայց ձեր խոսքում ես դատապարտող բան չտեսա»:
Հռիփսիմե ՋԵԲԵՋՅԱՆ
