«Հայաստանը մեր ռուս գործարարների համար շատ սիրելի եւ ցանկալի երկիր է, առանց վիզայի ռեժիմը եւ լեզվի արգելքների բացակայությունը շատ օգնում են այստեղ բիզնեսի զարգացմանը»,-այսօր այս մասին ասաց Հայաստանում Ռուսաստանի Դաշնության առեւտրային ներկայացուցիչ Աննա Դոնչենկոն: Նա «Sputnik Արմենիա» մուլտիմեդիոն մամուլի կենտրոնում ներկայացրեց ռուս-հայկական միջոցառումների ծրագիրը:
Աննա Դոնչենկոն, որը նաեւ ՀՀ-ում ռուսական բիզնեսի առեւտրային ներկայացուցիչն է, ասաց, որ ամենաակտիվ համագործակցությունը Մոսկվայի գործարարների հետ է, բայց ՌԴ մյուս շրջանները նույնպես հետաքրքրված են հայկական շուկայով: ՌԴ ներկայացուցչի խոսքով, հետաքրքրություն կա անգամ Արկտիկայի նկատմամբ եւ հիմնական ուղղություններից մեկը կլինի փոխադարձ զբոսաշրջությունը:
Ասաց նաեւ, որ արդեն կա պայմանավորվածություն` հայկական պատվիրակության այց Չեչնիայի հանրապետություն: Լենինգրադի շրջանի ռուս գործարարների հետ էլ արդեն կնքվել են պայմանագրեր, սակայն թե ինչ ապրանքատեսակներ կարտահանեն կամ կներկրվեն, տիկին Դոնչենկոն փակագծերը չբացեց՝ նշելով, որ այդ մասին կհայտարարեն, երբ գործարքները վերջնական տեսք ստանան: Նրա խոսքով, օրինակ, ռուսական ընկերություններից մեկը կներկրի բորոդինյան հացի եւ մարինացված վարունգի համերով՝ բարձր կարգի շոկոլադ:
Աննա Դոնչենկոյի խոսքով, շուկայի ուսումնասիրությունները ցույց են տվել, որ Հայաստանն ունի թեթեւ արդյունաբերության, էներգետիկայի, շինարարության ոլորտների մեծ ներուժ: Իսկ տեղեկատվական տեխնոլոգիաների ոլորտում էլ, ՌԴ առեւտրի ներկայացուցչի կարծիքով, ոչ թե երկկողմ համագործակցություն կարող է լինել, այլ՝ ավելի լայն՝ Եվրասիական տնտեսական գոտու սահմաններում:
Կարդացեք նաև
Նրա ներկայացմամբ, պայմանավորվածություն է ձեռք բերվել նաեւ «Տաշիր» ընկերության եւ «Հարավկովկասյան երկաթուղիների» միջեւ, բայց թե ինչ ձեւաչափով, Աննա Դոնչենկոն ասաց, որ այդ մասին կհայտարարեն երկու ընկերության ներկայացուցիչները:
Նրա հաշվարկներով, հայ-ռուսական համագործակցության արդյունքում արդեն կան 130 պայմանագրեր՝ ընդհանուր 75,5 միլիոն դոլար արժողությամբ:
Թե ինչպիսի դժվարությունների են հանդիպում ռուսաստանցի գործարարները դեպի Հայաստան արտահանում կատարելիս, Աննա Դոնչենկոն ասաց, որ բացի ճանապարհների, պահեստների համար վճարվող մեծ գումարներից, հիմնական խոչընդոտը, որի մասին նշում են արտահանողները, հայկական շուկայի փոքր շրջանառությունն է: Ըստ նրա Վերին Լարսի ռիսկն էլ խոչընդոտներից է, որի մասին անպայման տեղյակ են պահում գործարարներին:
Լուսինե ԲՈՒԴԱՂՅԱՆ
