Երևանում տեղի է ունեցել դաշնամուրի առաջին հայալեզու ձեռնարկի շնորհանդեսը։ Այն ուղեցույց է ինչպես դպրոցում սովորելու, այնպես էլ դաշնամուրին ինքնուրույն տիրապետելու համար։
Դասագրքի հեղինակ Անի Բաղդասարյանը դասավանդման տասներկու տարվա փորձ ունի։ Նա Ավետ Տերտերյանի անվան արվեստի դպրոցի փոխտնօրենն է։
Պատկերազարդ գիրքը կազմված է ժամանակակից մեթոդական մոտեցումներով և ՀՀ երաժշտական և արվեստի դպրոցների պետական ուսումնական ծրագրին համապատասխան։ Ուսուցանվող նյութը մատուցվում է սովորողի հետ անմիջական զրույցի ձևով։ Ձեռնարկում առկա բազմաթիվ խաղ-վարժությունների շնորհիվ ուսուցման ընթացքը դառնում է հետաքրքիր և մոտիվացնում ուսումնասիրել բոլոր բաժինները։ Ստեղծագործությունների ցանկն ամբողջովին կազմված է հազվադեպ կատարվող կամ Հայաստանում երբևէ չկատարված ստեղծագործություններից։
«Ձեռնարկն ավարտելով՝ սկսնակ երաժիշտը ձեռք կբերի հիմնարար տեսական գիտելիքներ, կկարողանա վերծանել և կատարել ոչ բարդ դաշնամուրային պիեսներ, կճանաչի տարբեր ժանրերի, բնույթի և ժողովուրդների երաժշտության նմուշներ: Սակայն ամենակարևորն այն է, որ սովորողը հաճույք ստանա հենց սովորելու պրոցեսից և ցանկություն ունենա խորացնել իր գիտելիքներն ու հմտությունները երաժշտության մեջ»,- նշում է գրքի հեղինակ Անի Բաղդասարյանը։
Կարդացեք նաև
«Դաշնամուրի առաջին հայալեզու ձեռնարկի տպագրությունն իրոք մեծ իրադարձություն է ազգային մակարդակով։ Այդ պատճառով ես ողջունում եմ «Ե՛կ նվագենք դաշնամուր» նախագիծը, դրա նպատակն ու այն խնդիրները, որն իր առջև դնում է հեղինակը։ Հատուկ կարևորություն ունի հենց այն փաստը, որ ձեռնարկը հայալեզու է։ Անի Բաղդասարյանը դարձել է գրքի ստեղծման գաղափարակիրը, ինչի համար նա արժանի է հարգանքի և վստահության, իսկ «Ամրոց» հիմնադրամը օգնել է ֆինանսավորմամբ և միանգամից հաստատել է նախագիծը՝ առանց երկար մտածելու»,- նշում է ՀՀ ժողովրդական արտիստ, աշխարհահռչակ հայ օպերային երգչուհի, «Սուրբ Սահակ և Մեսրոպ» պատվավոր շքանշանակիր Հասմիկ Պապյանը։
Շնորհանդեսի հյուրերի թվում էին ՀՀ ժողովրդական արտիստ, օպերային երգչուհի, «Սուրբ Սահակ և Մեսրոպ» պատվավոր շքանշանակիր Հասմիկ Պապյանը, դաշնակահարուհի, Երևանի պետական կոնսերվատորիայի դոցենտ Արմինե Սողոմոնյանը, «Ամրոց» ազգային զարգացման հիմնադրամի տնօրեն Արամ Սաֆարյանը, «ռեԱրմենիա» համագործակցության հարթակի տնօրեն Գևորգ Պողոսյանը, ԿԳՄՍ նախարարության ներկայացուցիչներ, Երևանի Կոմիտասի անվան պետական կոնսերվատորիայի դասախոսներ և Հայաստանի արվեստի և երաժշտական դպրոցների տնօրեններ։
«ռեԱրմենիա»-ն համագործակցության հարթակ է։ Այն հնարավորություն է ընձեռում յուրաքանչյուրին բարձրաձայնել Հայաստանի խնդիրները, ինչպես նաև առաջարկել այդ խնդիրները լուծող նախագծեր, կիսվել փորձով, հմտություններով կամ ֆինանսական և նյութական ռեսուրսներով։ «ռեԱրմենիա»-ն իր հերթին ստեղծում է միջավայր փոխադարձ վստահության և թափանցիկության ապահովման համար, որն արդյունավետ համագործակցության հիմքն է։
«ռեԱրմենիա»
